AQSh prezidenti Barak Obama Pekinda bo‘lib o‘tgan Osiyo-Tinch okeani iqtisodiy hamkorlik sammiti davomida o‘z xatti-harakatlari bilan xitoyliklar g‘azabini keltirdi, deb yozadi Korrespondent.net.
Gap shundaki, Obama o‘z avtomobilidan tantanali marosim o‘tkaziladigan binogacha bo‘lgan yo‘lni saqich chaynagan holda bosib o‘tdi. Ijtimoiy tarmoqlarda xitoyliklar Obamani bu qilig‘i uchun “repper” va “takasaltang” deb atadi.
Nashrning ta’kidlashicha, Obama o‘zining bu odati uchun avval ham ko‘p tanqidga uchragan. Chunonchi, Nelson Mandelaning dafn marosimida va Normandiyaga ittifoqdoshlar qo‘shinlarining joylashtirilganiga 70 yil to‘lgani munosabati bilan tashkil qilingan rasmiy marosimda ham saqich chaynayotganini ko‘rish mumkin edi.
The Washington Post yozishicha, Obama tamakiga bo‘lgan ishtiyoqini nikotinli saqich bilan yo‘qotishga harakat qilmoqda. Shu tufayli u qanchalik tanqidga uchramasin, saqichdan voz kechmaydi, deb yozadi nashr.
Bunday saqich chaynashni unga 2010-yildagi tibbiy ko‘rikdan so‘ng, AQSh harbiy dengiz kuchlari kapitani, Oq uy shifokori Jeffri Kulman tavsiya qilgan.
Izoh (0)