АҚШ президенти Барак Обама Пекинда бўлиб ўтган Осиё-Тинч океани иқтисодий ҳамкорлик саммити давомида ўз хатти-ҳаракатлари билан хитойликлар ғазабини келтирди, деб ёзади Korrespondent.net.
Гап шундаки, Обама ўз автомобилидан тантанали маросим ўтказиладиган биногача бўлган йўлни сақич чайнаган ҳолда босиб ўтди. Ижтимоий тармоқларда хитойликлар Обамани бу қилиғи учун «рэппер» ва «такасалтанг» деб атади.
Нашрнинг таъкидлашича, Обама ўзининг бу одати учун аввал ҳам кўп танқидга учраган. Чунончи, Нельсон Манделанинг дафн маросимида ва Нормандияга иттифоқдошлар қўшинларининг жойлаштирилганига 70 йил тўлгани муносабати билан ташкил қилинган расмий маросимда ҳам сақич чайнаётганини кўриш мумкин эди.
The Washington Post ёзишича, Обама тамакига бўлган иштиёқини никотинли сақич билан йўқотишга ҳаракат қилмоқда. Шу туфайли у қанчалик танқидга учрамасин, сақичдан воз кечмайди, деб ёзади нашр.
Бундай сақич чайнашни унга 2010 йилдаги тиббий кўрикдан сўнг, АҚШ ҳарбий денгиз кучлари капитани, Оқ уй шифокори Жеффри Кульман тавсия қилган.
Изоҳ (0)