Urugvay prezidenti Xose Muxika arab shayxlaridan biriga o‘zining 1987-yilgi Volkswagen Beetle (“Qo‘ng‘iz”) avtomobilini bir million dollarga sotishdan bosh tortdi. Bu haqda Noticias24 internet-portali xabar berdi.
Muxikaning aytishicha, unda bunday avtomobildan ikkitasi bor, ulardan biri yurmaydi. Ikkinchisini unga do‘stlari 2010-yilda sovg‘a qilgan.
Eslatib o‘tamiz, kamtarona hayot tarzi olib borishi bilan tanilgan Urugvay prezidenti Xose Muxika o‘zining Volkswagen Beetle rusumidagi avtomobili uchun ismi oshkor etilmagan arab shayxi tomonidan 1 million dollarlik taklif olgan edi.
Xose Muxika dunyodagi eng kambag‘al prezident hisoblanadi, chunki u 250 ming peso (12 500 dollar)lik maoshining 90 foizini har oy o‘zi tashkil qilgan kambag‘allarga yordam beruvchi Plan Juntos jamg‘armasi hisobiga o‘tkazib turadi. Mashinasini esa prezident daromadlar to‘g‘risidagi deklaratsiyada 70 ming peso (2850 dollar) deb ko‘rsatgan.
Izoh (0)