Turkmaniston mustaqilligining 23 yilligi 27-oktabr, dushanba kuni Ashxobodda harbiy parad bilan nishonlandi. Bu haqda “RIA Novosti” agentligi xabar berdi.
Prezident saroyi yonidagi maydonda o‘tgan harbiy parad mobaynida Turkmaniston qurolli kuchlari tomonidan yig‘ilganlarga harbiy texnika namunalari, jumladan T-90 va T-72 tanklari, piyodalar jangovar mashinasining zamonaviy namunalari, o‘ziyurar 2C1 “Gvozdika” va 2C3 “Akatsiya” artilleriya qurilmalari, “Shilka” nomli o‘ziyurar zenit mashinasi, “Karakal” tankka qarshi raketa moslamasi, “Pechora-M” zenitli raketa majmualari, “Smerch”, “Grad” artilleriya qurilmalari va boshqalarni namoyish etildi.
Bundan tashqari, paradda Turkmaniston harbiy-havo kuchlari tarkibida bo‘lgan samolyot va vertolyot namunalari ham namoyish etildi. Tribunalar ustidan MI-17-5 vertolyoti va MiG-29 samolyoti uchib o‘tdi.
Turkmaniston prezidenti Gurbanguli Berdimuhamedov xalqini Mustaqillik kuni bilan tabriklar ekan, “Yigirma uch yil avval ushbu tarixiy kunda xalqimiz o‘zining buyuk va muqaddas huquqi – jahon hamjamiyati tomonidan tan olingan va hozirgacha erishgan barcha yutuqlarimizning poydevori bo‘lgan suverenitet huquqini qo‘lga kiritdi”, — deya ta’kidladi.
Turkmaniston SSSR Oliy Kengashi 1991-yil 27-oktabrda “Turkmaniston mustaqilligi va davlat tuzilishi asoslari” Konstitutsiyaviy qonunini qabul qilgan. Bu qonunga asosan Turkmaniston SSSR hududida mustaqil demokratik davlat – Turkmaniston davlati paydo bo‘ldi.
Izoh (0)