AQShda Ebola.com internet-domeni Blue String Ventures kompaniyasi tomonidan 200 ming dollarga sotib yuborildi, deya xabar bermoqda Britaniyaning The Independent nashri. Uni marixuanadan tibbiy maqsadda foydalanishni targ‘ib qiluvchi Weed Growth Fund firmasi xarid qildi.
Blue String Ventures ushbu domenni 2008-yilda 13,5 ming dollarga sotib olgan va shundan buyon unga egalik qilib kelgan. Ebola.com domeni narxining o‘sishini Ebola virusi tarqalishi bilan bog‘lashmoqda. Kompaniya xo‘jayini Jon Shuls so‘zlariga ko‘ra, ushbu domenda joylashgan sayt tashrifchilari soni kuniga 5 million kishiga yetgan.
Butunjahon sog‘liqni saqlash tashkiloti ma’lumotlariga qaraganda, 25-oktabr holatiga ko‘ra, Ebola bezgagidan 4922 kishi vafot etgan. Shundan 4912 kishi Liberiya, Gvineya va Syerra-Leone mamlakatlarida nobud bo‘lgan. Ispaniya, AQSh va Malida ham ushbu bezgakdan vafot etish hollari qayd etilgan.
Izoh (0)