Rossiyaning Chelyabinsk viloyati Zlatoust shahri ustalari Checheniston rahbari Ramzan Qodirov portreti tushirilgan bir kilogramm og‘irlikdagi kumush tangalarni seriyali ravishda zarb etishni boshladi. Bu haqda ushbu tangalarni chiqaradigan “Orujeynik” fabrikasi direktori Vladimir Vasyuxinga tayanib “TASS” xabar berdi.
Uning aytishicha, Grozniy shahri (Checheniston poytaxti) kuniga bag‘ishlangan cheklangan seriya shaxsiy kolleksiyalar va muzeylarga tarqatiladi.
Kumush tangalarning har biri 1000 gramm og‘irlikka, 14 millimetr qalinlikka va 120 millimetr diametrga ega bo‘ladi. Tanganing yuza qismiga Ramzan Qodirov portreti, orqa qismiga Ahmadhoji Qodirov nomidagi masjid tasviri tushiriladi.