Туркманистон мустақиллигининг 23 йиллиги 27 октябрь, душанба куни Ашхободда ҳарбий парад билан нишонланди. Бу ҳақда «РИА Новости» агентлиги хабар берди.
Президент саройи ёнидаги майдонда ўтган ҳарбий парад мобайнида Туркманистон қуролли кучлари томонидан йиғилганларга ҳарбий техника намуналари, жумладан Т-90 ва Т-72 танклари, пиёдалар жанговар машинасининг замонавий намуналари, ўзиюрар 2C1 «Гвоздика» ва 2C3 «Акация» артиллерия қурилмалари, «Шилка» номли ўзиюрар зенит машинаси, «Каракал» танкка қарши ракета мосламаси, «Печора-М» зенитли ракета мажмуалари, «Смерч», «Град» артиллерия қурилмалари ва бошқаларни намойиш этилди.
Бундан ташқари, парадда Туркманистон ҳарбий-ҳаво кучлари таркибида бўлган самолёт ва вертолёт намуналари ҳам намойиш этилди. Трибуналар устидан МИ-17-5 вертолёти ва МиГ-29 самолёти учиб ўтди.
Туркманистон президенти Гурбангули Бердимуҳамедов халқини Мустақиллик куни билан табриклар экан, «Йигирма уч йил аввал ушбу тарихий кунда халқимиз ўзининг буюк ва муқаддас ҳуқуқи – жаҳон ҳамжамияти томонидан тан олинган ва ҳозиргача эришган барча ютуқларимизнинг пойдевори бўлган суверенитет ҳуқуқини қўлга киритди», — дея таъкидлади.
Туркманистон СССР Олий Кенгаши 1991 йил 27 октябрда «Туркманистон мустақиллиги ва давлат тузилиши асослари» Конституциявий қонунини қабул қилган. Бу қонунга асосан Туркманистон СССР ҳудудида мустақил демократик давлат – Туркманистон давлати пайдо бўлди.
Изоҳ (0)