Xitoy markazidagi Szyansu viloyatida yoshi uch ming yildan ortiq bo‘lgan qadimiy qilich topildi. Bu haqda “TASS” agentligi xabar bermoqda.
“Yanszi Vanbao” nashrining yozishicha, qilichni Laochjoulin nomli kichik daryoda 11 yoshli Yan Szyunsi topib olgan. Bola topilmani otasiga olib borib bergan, oila boshlig‘i esa uni mahalliy madaniy yodgorliklar byurosi ekspertlariga topshirgan.
Mutaxassislar qilichning eramizdan avvalgi 1600-1046-yillarda hukm surgan Shan sulolasiga tegishli bo‘lganini aniqlagan. Mahalliy muzey rahbariyati ota-o‘g‘ilga minnatdorchilik sifatida mukofot topshirgan.
Shan sulolasi davridan bizgacha toshbaqa kosalari va hayvonlar suyaklariga tushirilgan ko‘plab yozuvlar, shuningdek o‘sha davrdagi madaniy rivojlanishning yuksak darajada bo‘lganidan dalolat beruvchi bronza buyumlar yetib kelgan.
Izoh (0)