Hindiston bosh vaziri Narendra Modi tozalik va orastalikka bir yilda 100 soat yoki bir haftada 2 soat vaqt ajratishga va’da berdi. Bu haqda u 2-oktabr kuni Nyu-Delida “Toza Hindiston” umumhind kampaniyasiga start berar ekan, aytib o‘tdi, deb yozadi “RIA Novosti”.
Hindistonni tozalash kampaniyasi 2-oktabr — butun Hindiston bo‘ylab nishonlanadigan Mahatma Gandi tavalludiga bag‘ishlandi. Modining ta’kidlashicha, 2019-yil — Hindistonni nafaqat ozod, balki ozoda yurt sifatida ko‘rishni orzu qilgan Gandining 140 yilligiga mamlakat axlatlardan to‘liq tozalangan bo‘ladi.
O‘z nutqidan so‘ng Modi Nyu-Delidagi markaziy ko‘chalardan birida tantanali yurishga yetakchilik qildi va o‘z hamyurtlariga namuna sifatida trotuarning bir qismini supurib chiqdi.
Hukumat mamlakatni chiqindilardan tozalashga 2 trillion rupiy (taxminan 33 milliard dollar) sarflamoqchi. Ko‘chalarni tozalashdan tashqari, hind hukumati mamlakatning barcha fuqarolarini hojatxona va ichimlik suvi bilan ta’minlamoqchi.
Izoh (0)