18-sentabr, payshanba kuni Ukraina prezidenti Pyotr Poroshenko AQSh kongressi palatalarining birgalikdagi majlisida nutq so‘zladi. Uni minbarda uzoq olqishlar bilan qarshi olishdi, deya xabar berdi BBC.
Amerikalik kongressmenlarga murojaat qilar ekan, Poroshenko Rossiya xatti-harakatlarining butun dunyoga solayotgan xavfi to‘g‘risida ogohlantirdi va Amerikadan Ukrainani mushkul ahvolda tashlab qo‘ymaslikni so‘radi.
Shuningdek, u Kiyev ko‘chalarida uch oy davom etgan qarama-qarshilikda qo‘llab-quvvatlagani uchun AQShga minnatdorlik bildirdi, Rossiyaga qarshi kiritilgan sanksiyalar ahamiyatini alohida ta’kidladi va Amerikadan ularni qo‘llashda “g‘ayratliroq” bo‘lishni so‘radi.
Bundan tashqari, Poroshenko Ukraina armiyasiga qurol yetkazib berish zarurati borligini aytib o‘tdi.
“Ukraina harbiylariga ko‘proq harbiy jihozlar kerak. Qurol-yarog‘ va kiyim-bosh. Biz urushni ko‘rpalar bilan yenga olmaymiz”, — dedi u.
Poroshenkoning so‘zlariga ko‘ra, 5-sentabr — yarash sulhi e’lon qilinganidan buyon mamlakat sharqida 17 nafar ukrain harbiylari halok bo‘lgan.
U Ukraina NATOdan tashqarida AQShning alohida ittifoqdoshi maqomini olishga umid qilayotganini ta’kidladi.
Izoh (0)