Taniqli amerikalik aktyor Leonardo Di Kaprio Birlashgan Millatlar Tashkilotining iqlim muammolari bo‘yicha tinchlik elchisiga aylandi. Bu haqda AFP xabariga tayanib Tengrinews.kz xabar bermoqda.
39 yoshli aktyor kelasi haftada Nyu-Yorkda BMTning Iqlim o‘zgarishi muammolari bo‘yicha sammitida chiqish qiladi. “Men insoniyat tarixidagi bunday muhim pallada nutq so‘zlashni ma’naviy burchim deb bilaman. Bu harakatlar vaqtidir. Yaqin yillarda bizning iqlim inqiroziga qanday javob berishimiz insoniyat va sayyoramiz taqdirini belgilab beradi”, – deyiladi Di Kaprioning murojaatida. BMT Bosh kotibi Pan Gi Mun Di Kaprioni “atrof-muhitni muhofaza qilish harakatida ishonchga loyiq ovoz hisoblanadi”, – deya e’tirof etdi.
O‘tgan yili Leonardo Di Kaprio Butunjahon yovvoyi tabiat jamg‘armasi hisobiga Nepalda yo‘lbarslarni saqlab qolish va ko‘paytirish uchun 3 million dollar o‘tkazib bergan edi. 1998-yilda aktyor tabiatni muhofaza qilish faoliyatiga grantlar berish uchun maxsus jamg‘armaga asos solgan.
Izoh (0)