Kimyo bo‘yicha “Nobel umidlari” xalqaro olimpiadasida o‘zbekistonliklar birinchi o‘rinni egalladi

Tatariston respublikasi vakolatxonasida “Nobel umidlari” kimyo bo‘yicha I Xalqaro Olimpiada g‘oliblari va ishtirokchilari bilan uchrashuv bo‘lib o‘tdi. Ushbu olimpiada Qozon Milliy tadqiqot texnologik universiteti (QMTTU) tomonidan tashkil qilindi. Bu haqda Tataristonning O‘zbekistondagi vakolatxonasi matbuot xizmati xabar berdi.

Joriy yilning aprelida o‘tkazilgan olimpiadada MDH davlatlaridagi boshlang‘ich va o‘rta kasbiy ta’lim muassasalari o‘quvchilari ko‘ngilli ravishda qatnashdi.

O‘zbekistondan 100 ga yaqin litsey va kollej o‘quvchilari ushbu olimpiadaning sirtqi turida ishtirok etdi, undan 30 kishi muvaffaqiyatli o‘tib, 28—29-aprel kunlari Toshkentdagi “Rossotrudnichestvo” vakolatxonasida test shaklida imtihon topshirdi. G‘oliblarning eng katta qismi — 10 nafari o‘zbekistonlik yigit-qizlar bo‘ldi.

QMTTU rektori nomidan g‘oliblarga sertifikat va diplomlar topshirildi. Ular yordamida yoshlar universitetning turli yo‘nalishlariga imtihonsiz qabul qilinadi.