Toshkentda qizil chiroqqa o‘tib ketgan tramvayning inspektor tomonidan to‘xtatilishi ma’qullandi

Toshkentda Yo‘l harakati xavfsizligi bosh boshqarmasi xodimi svetoforning qizil chirog‘iga o‘tib ketgan tramvayni to‘xtatdi va bayonnoma tuzdi. Bu haqda Facebook’dagi “Voditeli Tashkenta” (“Toshkent haydovchilari”) guruhi a’zolari xabar berdi.

“YXHBB xodimi bu qoidabuzarlik bo‘yicha, taxminimcha, bayonnoma tuzdi. Natijada tramvaylar harakati 20 daqiqaga to‘xtab qoldi”, — dedi ijtimoiy tarmoq a’zosi.

Postga qoldirilgan izohlarning ko‘pchiligida guruh a’zolari YHXBB xodimini bu ishi uchun maqtagan va to‘g‘ri ish qilganini ta’kidlagan.

Ba’zi foydalanuvchilar tramvay haydovchilari doimiy ravishda yo‘l harakati qoidalarini buzishini yozgan bo‘lsa, boshqalar tramvay mashinistlarini avtobus haydovchilari kabi muntazam tekshirib turishni taklif qilgan. Yana bir izohda esa tramvay haydovchilari kechqurunlari tezlikni oshirib harakatlanishi “fosh qilingan”.

Bu qoidabuzarlik haqida rasmiy xabar berilmagan.