Fuqarolik ishlari bo‘yicha Olma-Ota sudi “Aniz adam” (“Afsonaviy shaxs”) jurnalining bosh muharriri Jarilkap Kalibayga faxriylar shikoyati bo‘yicha 13 million tenge (taxminan 70 ming dollar) to‘lash majburiyatini yukladi. Bu haqda Tengrinews.kz xabar berdi.
Gap shundaki, jurnalning aprel soni Adolf Gitlerning 125 yilligiga bag‘ishlangan edi. Sud qarori bo‘yicha Kalibay omma oldida uzr so‘rashi kerak edi, biroq u bunday hukmga rozi bo‘lmadi va shikoyat arizasi berishini aytdi.
Jurnalning shov-shuvga sabab bo‘lgan soniga “Gitler fashist emas” maqolasi kiritilgan bo‘lib, unda fashistlar rahnamosi oqlangan. Yana bir maqola esa Gitlerning “Mayn kampf” kitobiga bag‘ishlangan. Jurnalda kitobdagi ko‘pgina muammolar to‘g‘ri ochib berilgani ta’kidlangan.
Ushbu songa Qozog‘iston Tashqi ishlar vazirligi ham munosabat bildirib, bunday nashr nomaqbul ekanini ta’kidlagan. Aloqa va axborot milliy agentligi shov-shuvli sonda respublika konstitutsiyasi va qonunchiligidagi ijtimoiy, milliy, irqiy yoki diniy zidlikni avj oldirish qismini buzish alomatlari borligi haqida bayonot bergan.
21-aprel kuni Ikkinchi jahon urushi faxriylari jurnalning Gitler haqidagi sonini yoqib yuborishdi va hokimiyatga murojaat qilib, nashr litsenziyasini olib qo‘yishni so‘rashdi. Ular “Aniz adam” bosh muharririni jinoiy javobgarlikka tortishni ham talab qilishdi.
Jarilkap Kalibayning o‘zi esa barcha da’volarni rad etib, u shunchaki, Gitler kabi shaxslardan yetishi mumkin bo‘lgan xavflarni ko‘rsatmoqchi bo‘lganini aytdi.
Izoh (0)