O‘zbekistonlik birinchi ayol komissar – Svetlana Saakova OFK bayrog‘i ostida tashkil etiladigan o‘smir qizlar o‘rtasidagi mintaqaviy chempionatda komissarlik qiladi. Bu haqda O‘zbekiston Futbol federatsiyasi matbuot xizmati xabar berdi.
10—15-iyun kunlari Vyetnamning Xoshimin shahrida 14 yoshgacha bo‘lgan o‘smir qizlar o‘rtasida ASEAN mintaqasi chempionati bo‘lib o‘tadi. Musobaqaning “A” guruhida Vyetnam, Singapur, Filippin va Kamboja, “B” guruhida esa Tailand, Myanma va Malayziya terma jamoalari ishtirok etadi.
Ushbu musobaqa O‘zPFL mutaxassisi hisoblangan Svetlana Saakova uchun xalqaro o‘yinlardagi ilk komissarlik ishi bo‘ladi. Saakova 2014-yil yanvar oyida bo‘lib o‘tgan komissarlik imtihonlarini muvaffaqiyatli topshirib, Osiyo maydonlarida qizlar va ayollar o‘rtasidagi futbol musobaqalarida komissarlik faoliyatini olib borish huquqiga ega bo‘lgandi.
OFK 2013-yildan boshlab qit’aning to‘rt mintaqasida – Janubiy-Markaziy, Sharqiy, ASEAN va G‘arbiy Osiyo mintaqalarida 14 yoshgacha bo‘lgan o‘smir qizlar o‘rtasida mintaqaviy chempionatlarni o‘tkazib kelmoqda. Janubiy-Markaziy Osiyodagi 2014-yilgi mintaqaviy musobaqada Nepal g‘olib chiqqan bo‘lsa, G‘arbiy mintaqada iordaniyalik o‘smir qizlar kuchliroq chiqdi. Sharqiy Osiyo mintaqasidagi o‘yinlar 30-may kuni boshlandi.
Ma’lumot o‘rnida, hozirgi vaqtda o‘zbekistonlik Alim Arifov va Sanjar Rizayev Osiyo maydonlarida erkaklar o‘rtasida tashkil etilayotgan futbol musobaqalarida komissarlik qilib kelmoqda.
Izoh (0)