Payshanba kuni Avstraliyaning Bluefin 21 suvosti roboti bilan jihozlangan “Okean qalqoni” kemasi Hind okeanida yo‘qolgan Malayziyaning “Boing” samolyotini qidiruv ishlarini tugatdi. Qidiruv samarasiz bo‘lib chiqdi. Bu haqda “ITAR-TASS” xabar berdi. Qidiruv aprel oyida qutqaruvchilar tomonidan ushlangan signalni hisobga olib aniqlangan hududda olib borildi. Signal avialayner “qora quti”sidan kelayotgani taxmin qilingan edi.
Perte shahrida ishni davom ettirayotgan muvofiqlashtiruvchi qidiruv markazidagilarning xabariga ko‘ra, Bluefin 21 okean tubida umumiy maydoni 850 km² hududni tadqiq qildi. “Avialaynerga tegishli hech qanday alomatlar topilmadi”, — deyishdi ular. Ushbu sektor samolyot qoldiqlari bo‘lishi mumkin bo‘lgan ehtimoliy hududlar ro‘yxatidan o‘chirilishi mumkin.
Yakunlangan ish natijalariga qarab Hind okeanida 60 ming km² maydondagi yangi qidiruv hududi belgilanadi, okean tubi relyefi xaritalari o‘rganiladi va ko‘p tomonlama suvosti tadqiqotlari uchun qanday mutaxassislar kerak bo‘lishi aniqlanadi.
Keng ko‘lamdagi samolyotni qidiruv ishlarida qatnashayotgan ko‘plab davlatlar aprelda tutilgan signal manbasi avialaynerga tegishli “qora quti” emas, balki qutqaruv kemalaridan biri yoki ulardagi uskuna bo‘lishi mumkin, degan fikrni bildirmoqda.
Eslatib o‘tamiz, Malaysia Airlines’ga qarashli Boeing 777-200ER samolyoti 8-mart kuni Kuala-Lumpurdan Pekinga parvoz etayotib, radarlardan yo‘qolib qolgan. U Malayziya va Vyetnam chegarasini kesib o‘tganidan keyin bir necha daqiqa vaqt o‘tgach, aloqa uzilgan. Bevosita g‘oyib bo‘lishidan avval undan olingan xabarda biror muammo haqida gap ham bo‘lmagan. Samolyot bortida 12 nafar ekipaj a’zolari bilan birga jami 239 kishi bo‘lgan.
Izoh (0)