Пайшанба куни Австралиянинг Bluefin 21 сувости роботи билан жиҳозланган «Океан қалқони» кемаси Ҳинд океанида йўқолган Малайзиянинг «Боинг» самолётини қидирув ишларини тугатди. Қидирув самарасиз бўлиб чиқди. Бу ҳақда «ИТАР-ТАСС» хабар берди. Қидирув апрель ойида қутқарувчилар томонидан ушланган сигнални ҳисобга олиб аниқланган ҳудудда олиб борилди. Сигнал авиалайнер «қора қути»сидан келаётгани тахмин қилинган эди.
Перте шаҳрида ишни давом эттираётган мувофиқлаштирувчи қидирув марказидагиларнинг хабарига кўра, Bluefin 21 океан тубида умумий майдони 850 км² ҳудудни тадқиқ қилди. «Авиалайнерга тегишли ҳеч қандай аломатлар топилмади», — дейишди улар. Ушбу сектор самолёт қолдиқлари бўлиши мумкин бўлган эҳтимолий ҳудудлар рўйхатидан ўчирилиши мумкин.
Якунланган иш натижаларига қараб Ҳинд океанида 60 минг км² майдондаги янги қидирув ҳудуди белгиланади, океан туби рельефи хариталари ўрганилади ва кўп томонлама сувости тадқиқотлари учун қандай мутахассислар керак бўлиши аниқланади.
Кенг кўламдаги самолётни қидирув ишларида қатнашаётган кўплаб давлатлар апрелда тутилган сигнал манбаси авиалайнерга тегишли «қора қути» эмас, балки қутқарув кемаларидан бири ёки улардаги ускуна бўлиши мумкин, деган фикрни билдирмоқда.
Эслатиб ўтамиз, Malaysia Airlines’га қарашли Boeing 777-200ER самолёти 8 март куни Куала-Лумпурдан Пекинга парвоз этаётиб, радарлардан йўқолиб қолган. У Малайзия ва Вьетнам чегарасини кесиб ўтганидан кейин бир неча дақиқа вақт ўтгач, алоқа узилган. Бевосита ғойиб бўлишидан аввал ундан олинган хабарда бирор муаммо ҳақида гап ҳам бўлмаган. Самолёт бортида 12 нафар экипаж аъзолари билан бирга жами 239 киши бўлган.
Изоҳ (0)