Toshkent viloyati Olmaliq shahrida 51 yoshli ayol is gazidan vafot etdi. Bu haqda “Daryo”ga Bosh prokuratura axborot xizmati rahbari Hayot Shamsutdinov xabar qildi.
23-yanvar kuni Olmaliq shahar IIB Navbatchilik qismidan kelib tushgan xabarga ko‘ra, Olmaliq shahar, Kamolot ko‘chasidagi uyda yashovchi 1974-yilda tug‘ilgan ayol D.X. o‘z yashash xonadonida vafot etgani haqida xabar kelib tushgan.
Sud-tibbiy ekspertiza byurosining dastlabki ma’lumotnomasiga ko‘ra uning o‘limi o‘tkir is gazidan zaharlanish natijasida yuzaga kelgan o‘tkir yurak-qon tomir va nafas yetishmovchiligi oqibatida vafot etganligi ko‘rsatilgan.
Ijtimoiy tarmoqlarda tarqalgan xabarga ko‘ra, kechki vaqt gazga qaynatish uchun qo‘yilgan idishdagi suv qaynayverib suvi tugab qolsa-da, gaz yonib turavergan. Natijada uxlab yotgan uy bekasi zaharlanib vafot etgan. Marhumaning eri uyg‘onib gazni o‘chirgan, unda ham zaharlanish alomatlari borligi uchun shifoxonaga yotqizilgan.
Hozirda shahar prokuraturasi tomonidan tergovga qadar tekshiruv harakatlari olib borilmoqda.
Izoh (0)