Oliy Majlis Senati kengashining 2025-yil 13-yanvardagi qaroriga asosan “Tashabbusli byudjet” jarayonini o‘tkazish bo‘yicha amaldagi tartibga tegishli o‘zgartirishlar kiritildi. Bu haqda Iqtisodiyot va moliya vazirligi xabar qildi.
Unga ko‘ra, o‘z-o‘zini moliyalashtirish tizimiga o‘tilgani inobatga olingan holda 2025-yil 1-mavsumidan boshlab moliyaviy mustaqil bo‘lgan OTMlarning Tashabbusli byudjet jarayonlarida ishtirok etishiga ruxsat etilmaydi.
Mablag‘lardan samarali foydalanish hamda ijtimoiy muammolarga ko‘proq e’tibor qaratish maqsadida Tashabbusli byudjet doirasida tashkilotlar tomonidan barcha turdagi avtomobillar, jamoat xavfsizligini ta’minlashga oid jihozlar (radar, jamoat joylaridagi kuzatuv kameralari, svetofor), rahbar xodimlar uchun mebel jihozlarini xarid qilish taqiqlanadi.
Maktabgacha va maktab ta’limi hamda Sog‘liqni saqlash vazirliklari 10 kun muddatda Tashabbusli byudjet doirasida xarid qilinishi ruxsat etilgan tovarlarning aniq tavsiflarini aks ettirgan holda qayta shakllantirilgan jihozlar reyestrini Iqtisodiyot va moliya vazirligiga taqdim etilishi lozim.
Kambag‘allikni qisqartirish va bandlik vazirligi Iqtisodiyot va moliya vazirligi bilan hamkorlikda byudjet tashkiloti xodimlarini majburiy ovoz berishga jalb etish holatlarini oldini olish bo‘yicha tizimli ishlarni tashkil etadi hamda har mavsum yakuniga ko‘ra Senatga axborot kiritib boradi.
Qarorda qayd etilishicha, har yili tuman va shahar byudjetidan 10 tadan kam bo‘lmagan, ko‘pi bilan 30 ta loyiha uchun yetarli mablag‘ ajratilishi belgilandi. Bunda 10 tadan ortiq loyiha uchun mablag‘lar tuman yoki shahar aholisining tegishli hududdagi ulushidan kelib chiqib taqsimlanadi.
Prezidentning 2024-yil 25-dekabrdagi qaroriga asosan Tashabbusli byudjet jarayoni uchun tuman (shahar)larda ajratiladigan mablag‘lar miqdorini rejalashtirishda hududdagi aholi sonidan kelib chiqib taqsimlash nazarda tutilgandi.
Hozirgi kunda loyihalarning eng yuqori chegaraviy qiymati 1,5 milliard so‘mni tashkil etadi. Shunga ko‘ra, tuman va shahar budjetidan ajratiladigan mablag‘larning eng kam miqdori 15 milliard so‘m, eng yuqori miqdori esa 45 milliard so‘m etib belgilandi.
Izoh (0)