Navoiy viloyatining Qiziltepa tumani hokimi o‘rinbosari O‘lmas Istamov tashkilot rahbarlarini “Tashabbusli byudjet”ga ovoz yig‘ishga majburlagani uchun jarimaga tortildi.
Holatni nazoratga olgan Odam savdosiga qarshi kurashish va munosib mehnat masalalari bo‘yicha milliy komissiyaning ma’lum qilishicha, holat atroflicha o‘rganildi.
O‘rganish natijalariga ko‘ra, Qiziltepa tumani hokimining yoshlar va ijtimoiy rivojlantirish, maʼnaviy va maʼrifiy ishlar bo‘yicha o‘rinbosari tashkilot rahbarlarining xizmat vazifalariga kirmaydigan tashabbusli byudjet loyihasiga ovoz yig‘ishga targ‘ib qilgani va majburan jalb qilgani aniqlangan.
Bosh prokuratura hamda Davlat mehnat inspeksiyasi xodimlari tomonidan o‘tkazilgan o‘rganishda hokim o‘rinbosarining harakatlarida Maʼmuriy javobgarlik to‘g‘risidagi kodeksning tegishli moddalarida ko‘rsatilgan huquqbuzarlik alomatlari aniqlangan. O‘rganish natijalaridan kelib chiqqan holda mansabdor shaxsga nisbatan ushbu kodeksning 51-moddasi 1-qismi bilan jarima jazosi tayinlandi.
Ushbu moddaga ko‘ra, mehnatga biror-bir shaklda ma’muriy tarzda majburlash BHMning 50 baravaridan 100 baravarigacha (17 million so‘mdan 34 million so‘mgacha) miqdorda jarima solishga sabab bo‘lishi belgilangan. Xabarda hokim o‘rinbosari qancha jarimaga tortilganiga aniqlik kiritilmagan.
Eslatib o‘tamiz, O‘lmas Istamov tashkilot rahbarlariga kun davomida 50 tadan ovoz yig‘masa, ishdan olish bilan tahdid qilgandi. Uning yig‘ilishda aytgan gaplari yozib olingan audio ijtimoiy tarmoqlarda tarqalgandi.
Ma’lumot uchun, O‘lmas Istamov 2022-yilning fevral oyidan buyon tuman hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari lavozimida ishlab kelmoqda. Undan avval tumanda xalq ta’limi bo‘limi mudiri bo‘lib ishlagan.
Izoh (0)