Deputat Alisher Qodirov uni haqorat qilganlarni jazolamoqchiligini ma’lum qildi.
“Intizomsizga marhamat qilib jamiyatda nizomni beqadr qilayotganimizni tushundik. Erkin jamiyat milliy taraqqiyotning o‘zagidir. Erkinlik — farosati borlar uchun imkoniyat, farosati yo‘q notavonlar uchun zahmat olib keladi.
Tanqidlarga ochiqmiz, muloqot va muhokama vazifamiz, lekin ommaviy chiqishlarda haqorat ishlatadigan farosatida nuqsonlilarni jazolash orqali jamiyatni o‘zgarishiga hissa qo‘shmoqchimiz”, deb yozdi u va so‘zining so‘nggida #haqoratjazolanadi deya heshteg qoldirdi.
“Milliy tiklanish” partiyasi rahbari 23-yanvar kuni “gazni uy isitish va ovqat pishirishga ishlatib yuboradigan xalqning kosasi oqarmasligi”ni aytgandi.
“Gaz qimmat resurs, 1 kub gazdan 10 ga yaqin yuqori qiymatli, eksportbop mahsulot ishlab chiqarish, xorijga sotish va uning puliga millionlab qorako‘zlarimizga ish o‘rni yaratish mumkin. Tilla qatori milliardlab kub gazni uy isitish va ovqat pishirishga ishlatib yuboradigan xalqning kosasi oqarmaydi”, deb yozgandi deputat o‘z sahifasida.
U elektr energiyasi ishlab chiqarishni ko‘paytirib, gaz o‘rniga elektr energiyasi ishlatishni o‘rganish kerakligini ta’kidlagandi.
Bu ijtimoiy tarmoqlarda keng muhokamalarga sabab bo‘ldi. Ayrim foydalanuvchilar deputatni bu fikrlar uchun haqoratlab izohlar yozmoqda. Ma’muriy javobgarlik to‘g‘risidagi kodeksning 41-moddasiga ko‘ra, haqorat qilish, ya’ni shaxsning sha’ni va qadr-qimmatini qasddan kamsitish BHMning 20 baravaridan 40 baravarigacha (7,5 million so‘mdan 15 million so‘mgacha) miqdorda jarima solishga sabab bo‘ladi.
Oliy Majlis Qonunchilik palatasi deputati Javlon Abdullayev Alisher Qodirovning gazni uy isitish va ovqat pishirishga ishlatish qimmatga tushayotgani haqidagi fikrlari ijtimoiy tarmoqlarda noto‘g‘ri talqin qilinayotganini aytdi.
“Uning gaplarini to‘liq o‘qigan har qanday kishi masala dolzarbligi va to‘g‘ri ekanini yaxshi anglaydi. Gap shundaki, deputat gaz qimmat resurs, 1 kub gazdan 10 ga yaqin yuqori qiymatli, eksportbop mahsulot ishlab chiqarish, xorijga sotish va uning puliga millionlab qorako‘zlarimizga ish o‘rni yaratish mumkinligiga e’tibor qaratadi. Elektr energiyasi ishlab chiqarishni ko‘paytirib, gaz o‘rniga elektr energiyasi ishlatishni o‘rganishimiz kerakligini ta’kidlaydi. Aslida maqsad ham shu. Hukumat darajasida yaqinda bo‘lgan videoselektor yig‘ilishlarida “yashil” energetika sohasini rivojlantirish muhimligini har tomonlama asoslab berildi”, deydi Javlon Abdullayev.
Deputat cheklangan resurslar taqchilligi muttasil oshib borishi, ehtiyojlar ham, aholi soni ham shunga mutanosib tarzda o‘sayotganini qayd etib o‘tib, masalaning yechimi qayta tiklanuvchi muqobil energiyaga o‘tish ekanini aytdi.
“E’tibor qaratsak, biz har safar misol keltiradigan rivojlangan davlatlarning barchasi mana shu yo‘ldan ketgan va davom etmoqda. Gaz sotiladi, ishlab chiqarishda foydalaniladi. Aholi ehtiyoji esa qayta tiklanuvchi, yashil energetika orqali qoplanish sari harakat ketmoqda. Bu birlamchi ehtiyojning uzoq muddatli uzviyligini ham ta’minlaydi. Shunday ekan, yangi quriladigan uylarda energiya manbasi sifatida faqat elektr energiyasini tatbiq etish masalasini nima uchun qo‘llamasligimiz kerak”, deydi deputat.
23-yanvar kuni prezident raisligida bo‘lib o‘tgan videselektor yig‘ilishida 18 ming xonadon gazda individual isitiladigan qilib qurilgani uchun foydalanishga qabul qilinmay turgani aytilgandi. Mutasaddilarga ishchi guruhi tuzib, har bir holatni o‘rganib, masalaning yechimi bo‘yicha hukumatga taklif kiritish topshirildi. Bu yil 135 ming xonadonli ko‘p qavatli uylarni markazlashgan holda isitiladigan, ovqat pishirish esa elektr plitasi orqali bo‘ladigan qilib qurish zarurligi qayd etildi.
Izoh (0)