O‘zbekistonda yaqin ikki yilda barcha kommunal xizmatlar bir paket sifatida, bitta subyekt tomonidan taqdim etiladi va qarzdorlik ham umumlashtiriladi. Bu haqda “Milliy tiklanish” partiyasi raisi Alisher Qodirov ma’lum qildi.
Partiya fraksiyasining shu yil 9-dekabr kuni bo‘lib o‘tgan yig‘ilishida chiqindilarni to‘plash va olib chiqishda to‘lov intizomini mustahkamlashga qaratilgan qonun loyihasi muhokamalarga sabab bo‘lgan edi. Ushbu loyihada chiqindi to‘lovlaridan qarzi bo‘lganlarni SMS orqali xabardor qilib borish, qarzdorlik vujudga kelgani to‘g‘risida ogohlantirilgandan keyin to‘lov amalga oshirilmasa, ularning elektr energiyasi uchun to‘lovlarini qabul qilishni vaqtinchalik cheklash nazarda tutilgan.
Deputatlar qonun loyihasini qizg‘in muhokama qilib, bu masalada alohida o‘rganishlar olib borish, ya’ni yangi kiritilayotgan tizimning joylarda ishlashi bo‘yicha qo‘shimcha ma’lumotlar zarurligidan kelib chiqib, loyihani ko‘rib chiqishni fraksiyaning keyingi yig‘ilishiga qoldirgandi. Mas’ul idora vakillari e’tirozni qabul qilib, tez kunlarda ushbu masala bo‘yicha qo‘shimcha ma’lumotlar taqdim qilishga va’da bergandi. Fraksiya tomonidan qo‘llab-quvvatlanmagan qonun loyihasi palata yalpi majlisi kun tartibiga ham kiritilmagan edi.
Fraksiya tashabbusi bilan 12-dekabr kuni tashkil etilgan yig‘ilishda ushbu qonun loyihasi muhokama qilindi. Mas’ul idora vakillari chiqindi to‘lovlaridan qarzi bo‘lganlarni SMS orqali xabardor qilib borish, qarzdorlik vujudga kelganligi to‘g‘risida ogohlantirilgandan keyin to‘lov amalga oshirilmasa, ularning elektr energiyasi uchun to‘lovlarni qabul qilishni vaqtinchalik cheklashni nazarda tutuvchi yangi tizimning ishlash tartiblari ko‘rib chiqildi. Chiqindilarni to‘plash va olib chiqishda to‘lov intizomini mustahkamlashiga qaratilgan yangi tizim bejizga ishlab chiqilmagani qayd etildi.
Ma’lumotlarga ko‘ra, maishiy chiqindilarni to‘plash va olib chiqish bo‘yicha aholiga ko‘rsatilgan xizmatlar uchun debitor qarzdorlik hozirda 596 milliard so‘mni tashkil etib, yil boshiga qaraganda 115 milliard so‘m ko‘paygan. Qarzdorliklarni undirish to‘g‘risidagi arizalarni sudlarga kiritish bo‘yicha Ekologiya, atrof-muhitni muhofaza qilish va iqlim o‘zgarish vazirligining hududiy organlariga yuklatilgan vazifa ham amaliyotda o‘z samarasini bermayapti.
Fuqarolar alohida ogohlantirishdan keyin ham chiqindi bo‘yicha qarzdorlikni bartaraf etmasa, chiqindi bo‘yicha qarzini to‘lanmaguniga qadar elektr energiya bo‘yicha to‘lovni amalga oshirmaslik taklif qilinmoqda.
“Hammamiz yorug‘, issiq va toza yashashni istaymiz. Bu istagimizni ta’minlash uchun minglab vatandoshlarimiz tun-u kun ishlaydilar. Ularni haqini to‘lamaslik hammaga zarar”, deydi Alisher Qodirov.
Uning ta’kidlashicha, chiqindilarni to‘plash, saqlash va qayta ishlash jamiyat salomatligi uchun hayotiy masala. Noto‘g‘ri saqlanayotgan chiqindi poligoni kimyoviy quroldek xavfli va O‘zbekistonda 200 ta shunday poligon bor. Chiqindi masalasi eng oxirgi, xavfli nuqtasiga yetib keldi. Tartib bo‘lmagan tizimga investorlar milliardlab mablag’ini bermoqchi emas, investitsiyalarsiz esa tizimni o‘zgartirib bo’lmaydi.
“Chiqindi va elektr to‘lovlari bir tizimga ulanmoqda, navbat gaz va suv to‘lovlariga. Maqsad vatandoshga sifatli kommunal xizmatini ko‘rsatishning samarali tizimini yaratish”, deydi Qodirov.
Uning qayd etishicha, sifatsiz xizmat uchun chorani keskinlashtirish ham ko‘zda tutiladi
Izoh (0)