“Energiya sotish kompaniyalari o‘zi daromad ko‘rmagunicha sohada o‘zgarish bo‘lmaydi” — Alisher Qodirov

O‘zbekistonda energiya sotish kompaniyalari o‘zi daromad ko‘rmagunicha sohada o‘zgarish bo‘lmaydi. Bu haqda Oliy Majlis Qonunchilik palatasi deputati Alisher Qodirov ma’lum qildi.

Uning ta’kidlashicha, avtosanoatda monopoliya tugamasa avtomashina narxlari o‘zgarmaganidek, energetikada ham monopoliya tugamas, narxlar o‘zgarmas ekan, aholini gaz va elektr bilan ta’minlashda sifat o‘zgarmaydi.

“Sifatli ta’minot uchun yaroqli tarmoqlar bo’lishi kerak. Tarmoqlar yaroqli bo‘lishi uchun muntazam va qimmat ta’mir ishlari talab qilinadi. Bu budjet uchun og‘ir, qarzga qilish — teshik idishga suv quygandek gap, investorlar esa davlat bilan sherikchilik qilishni istashmaydi”, — deydi deputat.

Alisher Qodirovning so‘zlariga ko‘ra, aholini elektr va gaz bilan ta’minlashdagi muammo resurs yetishmovchiligi emas, boshqaruv va ta’minot tizimi eskirganida.

“Gaz ham elektr ham bor, yetmasa sotib olish imkoniyati bor, lekin minglab kilometr simlar va trubalar eskirib ketgan. Aholini elektr va gaz bilan ta’minlashdagi muammo resurs yetishmovchiligi emas, boshqaruv va ta’minot tizimining eskirganida. Istaganingizcha energetika vazirini (yoki meni, farqi yo‘q) tanqid qilishingiz mumkin, sohada hammamiz uchun og’ir va og’riqli, vaqt talab qiladigan islohotlar bo’lmas ekan, muammo turaveradi”, — degan u.

Mavzuga doir: O‘zbekiston energotizimida og‘ir oqibatli “avariya” – blekaut xavfi borligi ma’lum qilindi