“Bir oilada bolalar otasining tadbirsizligidan yangi yilni nafaqat kayfiyatsiz, otasiz ham kutishga majbur bo‘ldi” — Alisher Qodirov

Metan zapravkada gaz yo‘qligidan shikoyat qilib, masʼullarni tanqid qilgan fuqaro G‘ayrat Do‘stov 15 sutkaga qamalgandi. Oliy Majlis Qonunchilik palatasi deputati Alisher Qodirov ushbu holat bo‘yicha fikrlarini yozdi.

Deputat o‘z postida qator mavzular xususida so‘z yuritgan.

“Isrof va qadrsizlik eng katta musibatlarimiz bo‘lsa kerak. Sog‘lik, qadr, imkoniyat va mablag‘ni ignada yig‘ib, belkurakda sovuradigan millatga aylanib qolayotgandekmiz… Yangi yilda italyanlar eski mebellarini yangi yilga o‘tkazmaslikka harakat qilishsa, biz pulimizni kelgusi yilga o‘tkazmaslikka harakat qilayotgandek harakat qilamiz. Bozorga kirgan hamma narsa sotiladi, yana ikki karra qimmatiga. 1-yanvar kunidan yangi pul muomalaga kiritiladigandek…”, deb yozadi Qodirov.

U, shuningdek, to‘ylar mavzusida ham fikrlarini bayon etgan.

“Xuddi shunday — to‘ylar… ertaga kun yo‘qdek — isrof, tumonat, shovqin-suron, isrofgar dasturxonning yarmi axlatga otilishi bir dard, olomonning qahramoni bo‘lishga daʼvogar, surishtirsang, homiylik so‘ragan bolasining maktabida janjal qilgan yoki tashlab ketgan bolasining alimentiga daromadi yetarsiz, ikkisi ham bo‘lmasa, pul topib aql-baraka topmagan omadsiz-mast erkaklarning g‘ijimlab pul sochishi yana bir dard. G‘ayrati va imkoniyatini qadrlamaydigan jamiyat bo‘lib qolayotgandekmiz…”, deydi deputat.

Alisher Qodirov metan zapravkada gaz yo‘qligidan shikoyat qilib, masʼullarni tanqid qilgan fuqaro xususida shunday yozdi:

“Metan bolaga tushunmadim, baraka topgur, o‘zingni qadrla, g‘ayratingni bayramdan keyin qil, vazifasi surishtirish bo‘lgan idoralar surishtirishga majbur, bayramni bolalaring oldida emas, surishtiruv izolyatorida o‘tkazishing aniq edi-ku? Eʼtirozning to‘g‘ri-noto‘g‘riligi haqida keyinroq va kengroq, lekin bir oilada bolalar otasining tadbirsizligidan yangi yilni nafaqat kayfiyatsiz, otasiz ham kutishga majbur bo‘ldilar…

Davlat, qonun, hukumat — bu institutlarning hammasi inson uchun ishlaydi. Inson uchun ishlash uchun insonlar uchun cheklovlar joriy etadi va uni qo‘llashga vakolatli va majbur. Dunyoning istalgan davlatida haq va majburiyat bir-biriga chegara chizadi, qaysi tomon tartibliroq bo‘lsa, o‘sha tomonning hududi kengroq bo‘lgan, bundan keyin ham bo‘ladi.

O‘zini qadrlamaydigan, topganini tushunmaydigan, isrofchi jamiyatning haq hududi doimo tor bo‘lgan, bundan keyin ham shunday bo‘ladi”.

Alisher Qodirovga ko‘ra, “biz yo‘lning boshidamiz, inson har yilda bir yoshga ulg‘aysa, davlatlar, jamiyatlar o‘n, yigirma, ayrimlari esa yuz yillarda bir yoshga ulg‘ayadi”.

“Kuchli jamiyat bo‘lish uchun hali ko‘p tortishiladi, bu zarur va tabiiy jarayon, lekin qancha vaqt ketishi qadr va insof, baraka va isrof degan tushunchalarni tezroq anglab yetishimiz va hayotimizga tatbiq eta olishimizga bog‘liq. 2025-yil O‘zbekistonimizga hayrli va barakali kelsin”, deya qo‘shimcha qilgan u.