Депутат Алишер Қодиров уни ҳақорат қилганларни жазоламоқчилигини маълум қилди.
“Интизомсизга марҳамат қилиб жамиятда низомни беқадр қилаётганимизни тушундик. Эркин жамият миллий тараққиётнинг ўзагидир. Эркинлик — фаросати борлар учун имконият, фаросати йўқ нотавонлар учун заҳмат олиб келади.
Танқидларга очиқмиз, мулоқот ва муҳокама вазифамиз, лекин оммавий чиқишларда ҳақорат ишлатадиган фаросатида нуқсонлиларни жазолаш орқали жамиятни ўзгаришига ҳисса қўшмоқчимиз”, деб ёзди у ва сўзининг сўнггида #haqoratjazolanadi дея ҳештег қолдирди.
“Миллий тикланиш” партияси раҳбари 23 январь куни “газни уй иситиш ва овқат пиширишга ишлатиб юборадиган халқнинг косаси оқармаслиги”ни айтганди.
“Газ қиммат ресурс, 1 куб газдан 10 га яқин юқори қийматли, экспортбоп маҳсулот ишлаб чиқариш, хорижга сотиш ва унинг пулига миллионлаб қоракўзларимизга иш ўрни яратиш мумкин. Тилла қатори миллиардлаб куб газни уй иситиш ва овқат пиширишга ишлатиб юборадиган халқнинг косаси оқармайди”, деб ёзганди депутат ўз саҳифасида.
У электр энергияси ишлаб чиқаришни кўпайтириб, газ ўрнига электр энергияси ишлатишни ўрганиш кераклигини таъкидлаганди.
Бу ижтимоий тармоқларда кенг муҳокамаларга сабаб бўлди. Айрим фойдаланувчилар депутатни бу фикрлар учун ҳақоратлаб изоҳлар ёзмоқда. Маъмурий жавобгарлик тўғрисидаги кодекснинг 41-моддасига кўра, ҳақорат қилиш, яъни шахснинг шаъни ва қадр-қимматини қасддан камситиш БҲМнинг 20 бараваридан 40 бараваригача (7,5 миллион сўмдан 15 миллион сўмгача) миқдорда жарима солишга сабаб бўлади.
Олий Мажлис Қонунчилик палатаси депутати Жавлон Абдуллаев Алишер Қодировнинг газни уй иситиш ва овқат пиширишга ишлатиш қимматга тушаётгани ҳақидаги фикрлари ижтимоий тармоқларда нотўғри талқин қилинаётганини айтди.
“Унинг гапларини тўлиқ ўқиган ҳар қандай киши масала долзарблиги ва тўғри эканини яхши англайди. Гап шундаки, депутат газ қиммат ресурс, 1 куб газдан 10 га яқин юқори қийматли, экспортбоп маҳсулот ишлаб чиқариш, хорижга сотиш ва унинг пулига миллионлаб қоракўзларимизга иш ўрни яратиш мумкинлигига эътибор қаратади. Электр энергияси ишлаб чиқаришни кўпайтириб, газ ўрнига электр энергияси ишлатишни ўрганишимиз кераклигини таъкидлайди. Аслида мақсад ҳам шу. Ҳукумат даражасида яқинда бўлган видеоселектор йиғилишларида “яшил” энергетика соҳасини ривожлантириш муҳимлигини ҳар томонлама асослаб берилди”, дейди Жавлон Абдуллаев.
Депутат чекланган ресурслар тақчиллиги муттасил ошиб бориши, эҳтиёжлар ҳам, аҳоли сони ҳам шунга мутаносиб тарзда ўсаётганини қайд этиб ўтиб, масаланинг ечими қайта тикланувчи муқобил энергияга ўтиш эканини айтди.
“Эътибор қарацак, биз ҳар сафар мисол келтирадиган ривожланган давлатларнинг барчаси мана шу йўлдан кетган ва давом этмоқда. Газ сотилади, ишлаб чиқаришда фойдаланилади. Аҳоли эҳтиёжи эса қайта тикланувчи, яшил энергетика орқали қопланиш сари ҳаракат кетмоқда. Бу бирламчи эҳтиёжнинг узоқ муддатли узвийлигини ҳам таъминлайди. Шундай экан, янги қуриладиган уйларда энергия манбаси сифатида фақат электр энергиясини татбиқ этиш масаласини нима учун қўлламаслигимиз керак”, дейди депутат.
23 январь куни президент раислигида бўлиб ўтган видеселектор йиғилишида 18 минг хонадон газда индивидуал иситиладиган қилиб қурилгани учун фойдаланишга қабул қилинмай тургани айтилганди. Мутасаддиларга ишчи гуруҳи тузиб, ҳар бир ҳолатни ўрганиб, масаланинг ечими бўйича ҳукуматга таклиф киритиш топширилди. Бу йил 135 минг хонадонли кўп қаватли уйларни марказлашган ҳолда иситиладиган, овқат пишириш эса электр плитаси орқали бўладиган қилиб қуриш зарурлиги қайд этилди.
Изоҳ (0)