Firibgarlik uchun 2023-yildan beri qidiruvda bo‘lgan yana bir O‘zbekiston fuqarosi Turkiyada ushlandi.
Istanbuldagi Bosh konsulxonasi bergan ma’lumotga ko‘ra, u 1991-yilda tug‘ilgan Ahmadxon Ibragimov bo‘lib, firibgarlik jinoyatlarini sodir etib, fuqarolarga katta miqdorda zarar yetkazganlikda ayblanmoqda. Ushbu fuqaro Turkiya va O‘zbekiston Respublikasi Ichki ishlar vazirliklari hamkorligida o‘tkazilgan tezkor tadbir davomida qo‘lga olindi va Toshkent shahriga deportatsiya qilindi.
Ushbu shaxsning xatti-harakatlaridan jabrlangan fuqarolardan O‘zbekistonning Istanbul shahridagi Bosh konsulxonasiga yoki O‘zbekiston Ichki ishlar vazirligiga, shuningdek, ichki ishlar organlarining hududiy bo‘linmalariga murojaat qilish so‘raldi.
Bundan avval avtomobil oldi-sotdi sohasida ko‘plab firibgarlik jinoyatlarini sodir etganlikda ayblanib 2015-yildan buyon qidiruvda bo‘lgan o‘zbekistonlik erkak Turkiyada ushlangandi. Odam savdosi jinoyatini sodir etganlikda ayblanib, O‘zbekiston Ichki ishlar vazirligi tomonidan qidiruvda bo‘lgan ayol Toshkent shahriga deportatsiya qilingandi.
Jinoyat uchun jazoning muqarrarligini taʼminlash maqsadida Turkiya hududida hamkorlikdagi tadbirlar tizimli ravishda davom ettirilmoqda.
Izoh (0)