Og‘rilik jinoyatini sodir etganlikda ayblanib 4 yildan buyon qidiruvda bo‘lgan o‘zbekistonlik ayol Turkiyada ushlandi.
O‘zbekistonning Istanbuldagi Bosh konsulxonasi bergan ma’lumotga ko‘ra, u 1998-yilda tug‘ilgan Erkinova Gulruxxon Akmaljon qizi bo‘lib, 2020-yildan buyon qidiruvda bo‘lgan ushbu ayol Turkiya va O‘zbekiston IIV hamkorligida o‘tkazilgan tezkor tadbir davomida qo‘lga olinib, Toshkent shahriga deportatsiya qilindi.
Ushbu shaxsning xatti-harakatlaridan jabr ko‘rgan fuqarolardan O‘zbekistonning Istanbul shahridagi Bosh konsulxonasiga yoki O‘zbekiston Ichki ishlar vazirligi yoxud ichki ishlar organlarining quyi hududiy bo‘linmalariga murojaat qilish so‘raldi.
Bosh konsulxonaning bildirishicha, so‘nggi yillar davomida O‘zbekistonda tergov va suddan yashiringan ayrim shaxslarning Turkiya hududida yashirinishga urinishi bilan bog‘liq ko‘plab holatlar kuzatilmoqda. Shu bilan birga, Turkiya va O‘zbekiston Ichki ishlar vazirliklari o‘rtasidagi o‘zaro huquqiy yordam tadbirlari doirasida bu kabi shaxslarga nisbatan jinoiy ta’qibni amalga oshirish yanada samarali ko‘rinishga ega bo‘lmoqda.
Jumladan, birgina 2024-yilning 10 oyida javobgarlikdan qutulish maqsadida yillar davomida qardosh davlat hududida yashirinib yurgan 37 nafar ayblanuvchi qo‘lga olingan. Noyabr oyida yana qidiruvda bo‘lgan yana bir ayol Turkiyada ushlanib, Toshkentga deportatsiya qilindi.
Izoh (0)