26-avgust kuni Isroilda HAMAS kuchlari qo‘lidan garovdagilarni zudlik bilan ozod qilish hamda G‘azo sektoridagi urushni tugatish talabi bilan ommaviy norozilik namoyishlari bo‘lib o‘tmoqda. Bu haqda DW nashri xabar berdi.
Manbaga ko‘ra, namoyishchilar 26-avgust tongdan boshlab butun mamlakat bo‘ylab ko‘plab yo‘llarni to‘sib qo‘ygan. Xususan, Tel-Aviv yaqinidagi Ayolon tezkor trassasi vaqtincha to‘sib qo‘yilgan. Namoyishchilar garovdagilarning rasmlarini ko‘targan va avtomobil shinalarini yoqib yuborgan.
Garovga olinganlar qarindoshlari forumi butun Isroil bo‘ylab ko‘plab namoyishlarni o‘z ichiga olgan “Umumiy fuqarolik birdamligi kuni”ga qo‘shilishga chaqirgan. 26-avgust tunda Tel-Aviv markazidagi Garovdagilar maydonida yirik namoyish bo‘lib o‘tishi belgilangan.
Norozilik ishtirokchilari Isroil bosh vaziri Binyamin Netanyaxuni siyosiy sabablarga ko‘ra urushni ataylab cho‘zayotganlikda ayblashmoqda. Sababi o‘t ochishni to‘xtatishga Netanyaxuga ko‘plab masalalarda yordam beruvchi o‘ng radikal lagerdagi koalitsion hamkorlari qarshi chiqmoqda. Bu esa Netanyaxuning hokimiyatda qolish-qolmasligini belgilab beradi.
Isroil muxolifati yetakchisi Yair Lapid mamlakat hukumatidan HAMAS bilan urushni tugatish va garovdagilarni ozod qilish bo‘yicha kelishuv tuzishni talab qildi. Lapid Ynet axborot portaliga bergan intervyusida aytishicha, HAMAS va Isroil o‘rtasida vositachilik qilayotgan davlatlardan birining yuqori martabali vakili unga:
“Isroil hukumati hanuzgacha yaqinda taqdim etilgan kelishuv taklifiga javob bermagan. Bundan qariyb bir hafta oldin HAMAS AQSH prezidenti maxsus elchisi Stiv Uitkoff bahorda taklif qilgan rejaga 98 foiz rozi bo‘lgan”, degan.
Mazkur rejada 60 kunga o‘t ochishni to‘xtatish belgilangan bo‘lib, dastlabki bosqichda 10 nafar isroillik garovdagilarni ozod qilish evaziga falastinlik mahbuslar qamoqdan chiqarilishi lozim edi. Vositachi davlat vakili esa Yair Lapidga “Biz tushunmayapmiz, nega Isroil bizga javob qaytarmadi”, degan.
Izoh (0)