Qirg‘iziston maxsus xizmatlari tomonidan korrupsiyaga qarshi tekshiruv o‘tkazilgach, 20 mingdan ortiq talaba, jumladan, xorijliklar oliy o‘quv yurtlaridan chetlashtirildi. Bu haqda “Interfaks” nashri xabar qildi.
Qirg‘iziston oliy taʼlim tizimida korrupsiyaga qarshi kurash bo‘yicha olib borilayotgan chora-tadbirlar doirasida Milliy xavfsizlik davlat qo‘mitasi (MDQ) respublika oliy o‘quv yurtlarida tizimli qonunbuzarlik holatlarini aniqlagan.
Buning natijasida mamlakat bo‘ylab 20 mingdan ortiq talaba o‘qishdan chetlashtirildi. Ularning 13 ming 295 nafari oliy o‘quv yurtlaridan haydaldi.
Qirg‘iziston Milliy xavfsizlik boshqarmasi maʼlumotlariga ko‘ra, Pokiston, Hindiston, Bangladesh, O‘zbekiston, Tojikiston va boshqa mamlakatlardan kelgan xorijlik talabalar asosan O‘sh va Bishkek shaharlaridagi tibbiyot bilim yurtlarida tahsil oladi.
Tekshiruvlarda aslida oʼquv jarayonida ishtirok etmagan, lekin talabalar ro‘yxatiga kiritilgan o‘quvchilar aniqlangan. Mazkur faktlar asosida Qirg‘iziston Jinoyat kodeksining “Xizmat hujjatlarini qalbakilashtirish” moddasida nazarda tutilgan jinoyat bo‘yicha jinoiy ish qo‘zg‘atilgan.
Shuningdek, aniqlangan qonunbuzarliklarga aloqador oliy o‘quv yurtlari professor-o‘qituvchilari va boshqaruv xodimlaridan bo‘lgan shaxslarni topishga qaratilgan tergov tadbirlari davom etayotgani bildirilgan.
Izoh (0)