AQSH prezidenti Donald Tramp so‘nggi haftalarda Hindiston bosh vaziri Narendra Modi bilan telefonda suhbatlashishga to‘rt marta uringan, ammo Modi muloqotdan bosh tortgan. Bu haqda Frankfurter Allgemeine Zeitung (FAZ) gazetasi o‘z manbalariga tayanib xabar berdi.
Bundan oldin Tramp Hindistonni 25 foizlik eksport bojlari bilan larzaga solgan va uni “o‘lik iqtisodiyot” deb atagan edi.
“Modi o‘zini haqoratlanganday his qilganining belgilari bor”, deb ta’kidlaydi mualliflar.
Ularning fikricha, Tramp bilan telefonda gaplashishni xohlamasligi Hindiston bosh vazirining Oq uy rahbari harakatlaridan qanchalik norozi ekanligini ko‘rsatadi.
Maqolada ta’kidlanishicha, Hindistonda Trampga nisbatan uning Pokiston bilan munosabatlarni rivojlantirish istagi haqidagi bayonotlari sababli munosabat sezilarli darajada o‘zgargan.
Hindiston va AQSH fevral oyida Modining Vashingtonga tashrifidan so‘ng keng qamrovli savdo kelishuvi bo‘yicha muzokaralarni boshlagan edi. Ikki davlat 2030-yilga kelib o‘zaro savdo hajmini ikki barobarga oshirib, 500 milliard dollarga yetkazishni maqsad qilgan. Hujjatning kuzda imzolanishi kutilayotgan edi. Hindiston delegatsiyasi ushbu hujjat bo‘yicha muzokaralar o‘tkazish uchun Vashingtonga bir necha bor tashrif buyurgan. Amerika delegatsiyasining muzokaralarning oltinchi bosqichini o‘tkazish uchun 25-avgustga rejalashtirilgan Hindistonga tashrifi bekor qilindi.
6-avgust kuni Tramp farmon imzoladi. Unga ko‘ra, Hindistondan Rossiya neftini sotib olganlik uchun tovarlarga 25 foiz miqdorida qo‘shimcha bojlar joriy etildi. Keyinchalik AQSH rahbari ularni ikki barobar ko‘paytirib, 50 foizga yetkazish bilan tahdid soldi.
Izoh (0)