Prezident Shavkat Mirziyoyev 31-may kuni O‘zbekiston musulmonlari idorasi raisi, muftiy shayx Nuriddin Xoliqnazar bilan telefon orqali muloqot qildi. Bu haqda Prezident matbuot xizmati xabar berdi.
Hozirgi muborak kunlarda aziz yurtdoshlarimiz haj ziyorati uchun Makkayi mukarramada bo‘lib turishibdi. Davlat rahbari ular uchun yaratilgan sharoitlar, nuroniylarning salomatligi va kayfiyati haqida so‘radi.
Muftiy hazratlari haj amallarini sidqidildan, mukammal ado etish uchun barcha tashkiliy choralar ko‘rilganini taʼkidladi.
Ayni paytda 15 ming nafar hojilarning barchasi Saudiya Arabistoniga yetib borgan. Ularga 300 dan oshiq guruh rahbari, 50 nafar oliy toifali shifokor, 10 dan ziyod oshpazlar va boshqa mutaxassislar hamrohlik qilmoqda.
Bu yil O‘zbekiston tomonining talabiga muvofiq, Arafot hududidagi chodirlar yopiq tarzda barpo etildi. Ularning atrofi issiq o‘tkazmaydigan panellar bilan o‘ralgan, sovutish tizimi o‘rnatilgan, gilam va to‘shaklar solingan. Bu hozirgi yoz kunlarida ziyoratchilarga qo‘shimcha qulaylik yaratadi.
Bir so‘z bilan aytganda, bu yilgi haj mavsumiga yana-da yuqori darajada tayyorgarlik ko‘rilib, barcha zarur sharoitlar hozirlandi. Bundan qalbida shukronalik hissi jo‘shgan yurtdoshlar muqaddas joylarda turib, Yaratgandan mamlakat tinchligi, xalq farovonligini so‘rab duolar qilmoqda.
Muftiy Nuriddin Xoliqnazar prezidentga ulug‘ ibodat fayzi bilan yurgan hojilarimizning salomi va duolarini yetkazdi. Davlat rahbari barcha ziyoratchilarga salom yo‘llab, yurtga sog‘-omon kelishlarini tiladi.
Suhbat samimiy va ko‘tarinki ruhda o‘tdi. Muhtaram hojilar O‘zbekistonga qaytgach, mahallalarda ijtimoiy muhitini mustahkamlash, ehtiyojmand insonlarga ko‘mak berish, yoshlarni ilm-maʼrifatga targ‘ib etishda namuna ko‘rsatishlariga umid bildirildi.
Izoh (0)