Bugun, 30-may kuni O‘zbekiston Respublikasi Prezidenti Shavkat Mirziyoyev rasmiy tashrif bilan Qozog‘iston poytaxti Ostona shahrida bo‘ladi.
Tashrif doirasida Qozog‘iston va O‘zbekiston yetakchilari o‘rtasidagi do‘stona va ishonchli muloqot, ikki tomonlama hamkorlikning bugungi holati va istiqbollari, shuningdek, mintaqaviy va xalqaro ahamiyatga molik masalalar muhokama qilinishi kutilmoqda.
Bugunning o‘zida davlatimiz rahbari Ostonada bo‘lib o‘tadigan “Markaziy Osiyo – Italiya” formatidagi oliy darajadagi sammitda ham qatnashadi. Ushbu tarixiy uchrashuvda Markaziy Osiyo davlatlari rahbarlari va Italiya Respublikasi Bosh vaziri ishtirok etadi.
Sammit doirasida Italiya va mintaqa mamlakatlari o‘rtasidagi siyosiy-diplomatik, savdo-iqtisodiy, transport va energetika sohalaridagi hamkorlikni rivojlantirish, o‘zaro manfaatli kelishuvlar yuzasidan muzokaralar olib boriladi.
Tadbirning asosiy yo‘nalishlari — «yashil« iqtisodiyot, investitsiya, innovatsiya, fan va taʼlim sohalaridagi hamkorlikni chuqurlashtirish bo‘ladi. Bu boradagi muhokamalar mintaqaning barqaror rivojlanishi uchun strategik ahamiyat kasb etadi.
Shuningdek, Prezident Shavkat Mirziyoyevning Markaziy Osiyo davlatlari yetakchilari bilan o‘tkazadigan ikki tomonlama uchrashuvlari bo‘lib o‘tishi nazarda tutilgan. Bundan tashqari, davlatimiz rahbari “Markaziy Osiyo + Italiya” formatidagi platforma doirasida hamkorlikning istiqbolli yo‘nalishlari bo‘yicha strategik ahamiyatga ega tashabbuslarni ilgari surishi kutilmoqda.
S. Jo‘rayev
Izoh (0)