O‘zbekistonda ramazon oyida 1400 nafar kam ta’minlangan fuqaro umra ziyoratiga yuborildi
Shavkat Mirziyoyev O‘zbekiston musulmonlari idorasi raisi, muftiy Nuriddin Xoliqnazarovni qabul qildi. Bu haqda prezident matbuot xizmati xabar berdi.
Muloqotda diniy-ma’rifiy yo‘nalishlarda, buyuk ajdodlarimiz ilmiy merosini o‘rganish va xalqqa yetkazish borasida amalga oshirilayotgan ishlar sarhisob qilindi.
O‘zbekistonda ijtimoiy-ma’naviy muhit barqarorligini ta’minlash, diniy ta’lim sifatini yanada oshirish, ushbu yo‘nalishdagi ilg‘or xalqaro tajribani o‘rganib, mamlakatdagi diniy ta’lim muassasalari faoliyatiga tatbiq etish bo‘yicha tizimli ishlar amalga oshirilmoqda.
Shavkat Mirziyoyevning 21-martdagi qaroriga muvofiq, mamlakatda muborak ramazon oyi fayzli va shukuhli o‘tdi. Insonlarni yaxshilik va mehru saxovatga, bugungi tinch va osoyishta hayotimizni qadrlashga undaydigan ma’naviy-ma’rifiy tadbirlar o‘tkazildi.
Davlat rahbarining tashabbusi bilan barcha imom-xatiblar ishtirokida mahallalardagi 1 milliondan ziyod kam ta’minlangan aholining uyida iftorliklar uyushtirildi. “Vaqf” xayriya jamoat fondi hisobidan yordamga muhtoj fuqarolarga 2 milliard 446 million so‘mlik xayr-u ehsonlar qilindi.
Bu yilgi Ramazon oyidagi yana bir muhim yangilik 1 ming 400 nafar kam ta’minlangan fuqarolarning davlat tomonidan umra ziyoratiga yuborilishi bo‘ldi. Ular muqaddas manzillarda turib, xalqimizga tinchlik, fayzu baraka tilab xayrli duolar qildi. Prezident jamiyatda diniy bag‘rikenglikni yanada mustahkamlash, fuqarolarning vijdon erkinligini kafolatlash bo‘yicha o‘z fikrlarini bildirdi.
