Yaponiya poytaxti Tokio shahrida 2024-yilga oid bir nechta jinoyatlarni sodir etganlikda gumonlanib, 5 nafar o‘zbekistonlik erkak hibsga olindi. Bu haqda Tokyo Reporter nashri xabar berdi.
Ma’lumotlarga ko‘ra, 30-dekabr kuni Shibuya rayonida 21 yoshli Hasanboy Do‘smatov va uning sheriklari uch nafar xorijlik fuqaroga yaqinlashgan. Do‘smatov ulardan birining yuziga tepib, sheriklari bilan birga 210 ming iyena (taxminan 1400 dollar) qiymatidagi hamyon va sumkalarni o‘g‘irlagan.
Bosqinchilik va tan jarohati yetkazish ayblovi bilan qo‘lga olingan Do‘smatov tergovchilarga: “Advokatim kelmaguncha gapirmayman”, deya izoh berishdan bosh tortgan. Qolgan to‘rt gumonlanuvchi esa ayblovlarni rad etgan.
Politsiya ma’lumotlariga ko‘ra, ushbu besh kishidan to‘rt nafari, jumladan, Do‘smatov ham Yaponiyada noqonuniy yashab kelgan. U va uning hamrohlari 2023-yil avgustidan beri Shibuya hamda Shinjuku kabi gavjum hududlarda ko‘chada uxlayotgan odamlarni talon-toroj qilgan bo‘lishi mumkin.
Ular o‘g‘irlangan kredit kartalari yordamida iPhone smartfonlarini xarid qilib, ularni qayta sotish orqali taxminan 8 million iyena (55 ming dollardan ortiq) foyda ko‘rganlikda gumonlanmoqda.
Do‘smatov guruhning rahbari bo‘lgan. U Telegram orqali jinoyatlar sodir etilishi kerak bo‘lgan sana va vaqtlarni xabar qilgan, deydi politsiya.
Izoh (0)