Tailandning Oliy ma’muriy sudi ixtiyoriy ravishda chet elda yashayotgan sobiq bosh vazir Yinglak Chinavatni fermerlarni subsidiyalash bo‘yicha muvaffaqiyatsiz dasturi tufayli davlatga yetkazilgan katta zarar uchun 10 milliard batdan ortiq (taxminan 305 million dollar) to‘lash majburiyatini yukladi. U 2017-yilda xizmat vazifasiga sovuqqonlik bilan qaragani uchun 5 yilga qamalgan edi. Bu haqda Reuters agentligi xabar bermoqda.
Nashr ma’lumotlariga ko‘ra, 22-may kuni Tailand sudi sobiq bosh vazir Yinglak Chinavat ishi bo‘yicha qaror qabul qilib, unga hokimiyat tepasida bo‘lgan davrida fermerlarni qo‘llab-quvvatlash dasturi muvaffaqiyatsizlikka uchragani uchun davlatga 10 milliard bat (taxminan 305 million dollar) zararni qoplash majburiyatini yukladi.
Ushbu hukm 2017-yilda Yinglak xizmat vazifasiga sovuqqonlik bilan yondashganlikda aybdor deb topilib, sirtdan besh yilga ozodlikdan mahrum etilganidan beri davom etayotgan sud jarayonining davomi bo‘ldi. Siyosatchi qamoqdan qochish uchun hamon chet elda yashab kelmoqda.
Sud Yinglak “davlatga zarar yetkazgan holda o‘z vazifalarini qo‘pol e’tiborsizlik bilan bajarganini va shu sababli tovon puli to‘lashi kerakligini” ta’kidlagan. Shu bilan birga, sud 35 milliard bat to‘lash to‘g‘risidagi avvalgi qaror noqonuniy bo‘lgani va javobgarlikning ruxsat etilgan chegarasidan oshib ketganini tan oldi.
Sud qarori “Pheu Thai” partiyasining ikki yildan kamroq vaqt oldin hokimiyatga siyosiy qaytishi hamda Yinglakning akasi Taksinning 15 yillik surgundan so‘ng Tailandga qaytib kelishi fonida qabul qilindi. Shinavatlar oilasi armiya va konservativ kuchlar tomonidan siyosiy ta’qib qilinayotganini ta’kidlashda davom etmoqda.
Hukmni sharhlagan Yinglak “10 milliard bat to‘lash to‘g‘risidagi buyruq haddan tashqari”, deb aytgan.
Shinavat siyosiy sulolasi vakili va Tailandning sobiq bosh vaziri Taksin Chinavatning singlisi Yinglak 2011-yilda hokimiyat tepasiga kelgan va 2014-yildagi harbiy to‘ntarishdan sal oldin lavozimini tark etgan. Hozirda u amaldagi bosh vazir Paetongtan Chinavatning xolasi hisoblanadi.
Ta’kidlanishicha, “Pheu Thai” partiyasi tomonidan faol ilgari surilgan guruch dasturi fermerlardan guruchni bozor narxidan 50% yuqori narxlarda sotib olishni nazarda tutgan. Natijada omborlarda millionlab tonna sotilmagan don to‘planib qolgan, davlat esa milliardlab zarar ko‘rgan.
Izoh (0)