Tailand sobiq bosh vaziri Yinglak Chinavat o‘z mamlakatida besh yilga ozodlikdan mahrum etilishga sirtdan hukm qilingach, Birlashgan Arab Amirliklarining Dubay shahriga qochib ketdi. Bu haqda bosh vazir Prayut Chan-Ocha brifing chog‘ida jurnalistlarga ma’lum qildi, deb yozadi “TASS”.
“Endi politsiya o‘z harakatlarini tashqi ishlar vazirligi va Interpol bilan muvofiqlashtiradi”, — dedi Tailand hukumati rahbari. “U Dubayda”, — deya tasdiqladi u.
Tailand Oliy sudi 27-sentabr, chorshanba kuni sobiq bosh vazir Chinavatni qishloq xo‘jalik ishlab chiqaruvchilaridan garovga guruch sotib olish davlat dasturini amalga oshirishda mas’uliyatsizlikka yo‘l qo‘yganlikda sirtdan aybdor deb topdi. Tailandning yangi konstitutsiyasiga muvofiq, Chinavat ushbu hukm ustidan 30 kun ichida shikoyat arizasi berish huquqiga ega.
Chinavatning “guruch ishi” bo‘yicha qaror 25-avgustdayoq chiqarilishi kerak edi, ammo bir kun avval siyosatchi mamlakatdan yashirincha chiqib ketib, avtomobilda Kambodjaga bordi, so‘ng akasi Taksin Chinavat yashaydigan BAAga yo‘l oldi.
Izoh (0)