Абат Файзуллаев Ўзбекистоннинг Сан Маринодаги биринчи элчиси этиб тайинланди. Бу ҳақда “Дунё” ахборот агентлиги хабар қилди.
Элчи ушбу давлат раҳбарлари — Капитан-регентлар Франческа Чиверкя ва Далибор Риккардига ишонч ёрлиқларини топширди. Тантанали маросимда Сан Марино ташқи ишлар вазири Лука Беккари сўзга чиқиб, Ўзбекистон ва Сан Марино ўртасидаги алоқаларни ривожлантиришга қаратилган саъй-ҳаракатларни, жумладан, ушбу мамлакатга биринчи элчининг тайинланишини юқори баҳолади.
Ўзаро савдо-иқтисодий ҳамкорликни ривожлантириш, икки томонлама шартнома-ҳуқуқий базани мустаҳкамлаш, кўп томонлама ҳамкорлик йўналишида, хусусан, БМТ ва ЕХҲТ доирасида номзодлар ва ташаббусларни ўзаро қўллаб-қувватлаш каби мавжуд манфаатли шерикликни давом эттиришга ишонч билдирилди.
Сан Марино дунёдаги энг кичик давлатлардан бири ҳисобланади. Мамлакат Жанубий Европада жойлашган ва тўрт томондан ҳам Италия билан чегарадош. Ўзбекистон ва Сан Марино ўртасидаги дипломатик муносабатлар 2021 йил 3 февралда ўрнатилган.
Абат Файзуллаев 2023 йил ноябрь ойидан буён Ўзбекистоннинг Италиядаги элчиси ва Римдаги халқаро ташкилотлар (FAO, QXRXJ, BOOD) ҳузуридаги доимий вакили ҳамда 2024 йил декабрь ойидан бошлаб Ўзбекистоннинг Кипрдаги элчиси сифатида фаолият юритиб келмоқда. 2025 йилнинг март ойида у Ўзбекистоннинг Малтадаги биринчи элчиси этиб ҳам тайинланди.
Абат Файзуллаев 2020—2023 йилларда Ўзбекистоннинг Австриядаги ва ўриндошлик асосида Венгриядаги элчиси сифатида ишлаган. У бир вақтнинг ўзида Ўзбекистоннинг Европада хавфсизлик ва ҳамкорлик ташкилоти ҳамда Венадаги бошқа халқаро ташкилотлар ҳузуридаги доимий вакили лавозимида фаолият олиб борган.
Изоҳ (0)