Ўзбекистоннинг Венгриядаги элчиси Абат Файзуллаев Будапешт шаҳрида қишлоқ хўжалиги ва озиқ-овқат ишлаб чиқариш бўйича мамлакатнинг етакчи компанияларидан бири — «Bonafarm Group» бош ижрочи директори Аттила Чани билан музокаралар ўтказди, деб хабар бермоқда «Дунё» ахборот агентлиги.
Қайд этилишича, учрашув чоғида Тошкент вилоятининг Оҳангарон туманида қўшма паррандачилик кластерини ташкил этиш масалалари муҳокама қилинган.
Аттила Чани Ўзбекистонда паррандачилик жабҳаси истиқболли соҳалардан бири эканини қайд этди. Унинг айтишича, парранда гўшти энг арзон оқсил манбаларидан бири бўлиб, ҳозирги кунда Ўзбекистон аҳолиси сонининг тез ўсаётгани парранда гўшти истеъмолига бўлган эҳтиёжни ҳам сезиларли даражада оширмоқда. Таҳлил натижаларига кўра, талабни қондириш учун Ўзбекистонда яқин 10 йил ичида ҳар бири йилига 60 миллион товуқ гўшти ишлаб чиқариш қувватига эга бўлган иккита йирик парранда гўштини қайта ишлайдиган завод ташкил қилиш мумкин.
Бу масала Венгрияга амалга оширилган олий даражадаги ташриф арафасида Ўзбекистон қишлоқ хўжалиги вазири Азиз Воитов билан муҳокама қилингани ва ўзбек томонидан Тошкент вилояти Оҳангарон туманида паррандачилик кластерини ташкил этиш лойиҳаси илгари сурилгани таъкидланган.
«Bonafarm Group» компанияси бош ижрочи директори мазкур лойиҳага қизиқиш билдирган ҳолда уни амалга ошириш имкониятларини батафсил ўрганиш учун яқин кунларда компаниянинг ишчи гуруҳи Ўзбекистонга амалий сафари билан боришини маълум қилди.
«Bonafarm Group» компанияси 2009 йилда ташкил этилган бўлиб, қишлоқ хўжалиги ва озиқ-овқат маҳсулотлари, жумладан, чорвачилик, виночилик, ем-хашак етиштириш, гўшт-сут маҳсулотлари ишлаб чиқариш билан шуғулланадиган етакчи корхоналарни бирлаштирган. Компания активлари миқдори 1,9 миллиард долларни, товар айланмаси эса 805 миллион долларни (2021 йил) ташкил этади. Ҳозирги пайтда компания корхоналарида 8 минг 400 нафар ходим меҳнат қилмоқда.
Изоҳ (0)