Венгрия компанияси билан ҳамкорликда Ўзбекистонда автомобиль бутловчи қисмларини ишлаб чиқариш масаласи муҳокама қилинди.
Хабар қилинишича, Шавкат Мирзиёевнинг 3—4 октябрь кунлари Венгрияга амалга оширган расмий ташрифи доирасида ўтказилган олий даражадаги музокаралар чоғида эришилган келишувлар ижросини муҳокама қилиш мақсадида Ўзбекистоннинг Венгриядаги элчиси Абат Файзуллаев Будапешт шаҳрида Венгриянинг автомобилсозлик саноатида юқори технологик эҳтиёт қисмларини ишлаб чиқарувчи Раба Automotive Holding Plc. компанияси бош ижрочи директори Бела Хецман билан музокаралар ўтказди.
Суҳбат давомида Бела Хецман Ўзбекистон Марказий Осиё минтақасида кучли автомобилсозлик ва қишлоқ хўжалиги машинасозлиги саноатига эгалиги, UzAuto компанияси билан ўзаро манфаатли ҳамкорликни йўлга қўйиш Венгрия компанияси учун катта аҳамиятга эгалигини таъкидлади.
2022 йил 4 октябрь куни Раба Automotive Holding, UzAuto ва Ўзбекистоннинг Тўғридан-тўғри инвестициялар жамғармаси ўртасида меморандум имзоланган бўлиб, унда томонлар автомобиллар учун ғилдирак ўқлари ва шасси бутловчи қисмларини етказиб бериш, уларни ишлаб чиқаришни маҳаллийлаштириш бўйича ҳамкорлик қилишлари белгиланган.
Ушбу масалани батафсил муҳокама қилиш ва ҳамкорликнинг кейинги босқичларини белгилаб олиш учун Бела Хецманнинг 10—11 ноябрь кунлари Туркий давлатлар ташкилоти саммитида иштирок этувчи Венгрия делегацияси таркибида Самарқанд шаҳрига ташрифини амалга оширишга келишилди.
Шунингдек, учрашув давомида 10 ноябрь куни Самарқанд шаҳрида ўтказиладиган Ўзбекистон–Венгрия бизнес-форумида иштирок этиш ҳамда маҳаллий ҳамкорлар билан тегишли инвестиция лойиҳаларини муҳокама қилиш учун икки томонлама учрашувлар ташкил этиш режа қилинди.
125 йилдан ортиқ тажрибага эга бўлган Раба Automotive Holding Plc. компанияси жаҳон автомобиль бозори учун қишлоқ хўжалиги техникаси, автотранспорт воситалари учун ғилдирак ўқлари ва бошқа шасси бутловчи қисмларини ишлаб чиқаришга ихтисослашган йирик компанияларидан бири ҳисобланади. Компания ўз маҳсулотларини Европа Иттифоқи, Шимолий Америка ва МДҲ мамлакатларига экспорт қилади.
Изоҳ (0)