Ўзбекистоннинг янги тайинланган элчиси Абат Файзуллаев Италия президенти Сержо Маттареллага ишонч ёрлиқларини топширди. Бу ҳақда “Дунё” агентлиги хабар берди.
Қайд этилишича, тантанали маросим Италия президентининг Рим шаҳридаги расмий қароргоҳи – “Квиринале” саройида бўлиб ўтган. Суҳбат давомида Сержо Маттарелла 9-11 ноябрь кунлари Ўзбекистонга амалга оширган расмий ташрифини ёдга олган ва ташриф унда унутилмас таассуротлар қолдирганини қайд этган.
Учрашувда икки мамлакат ўртасида стратегик мулоқотни илгари суришнинг юксак аҳамияти тасдиқланган, Ўзбекистон ва Италиянинг сиёсий, савдо-иқтисодий ва маданий-гуманитар ҳамкорлиги истиқболларидан самарали фойдаланишдан икки томон ҳам манфаатдорлиги таъкидланган.
Эслатиб ўтамиз, Абат Файзуллаев октябрь ойида Ўзбекистоннинг Италиядаги элчиси этиб тайинланди. У 2020-2023 йилларда Ўзбекистоннинг Австриядаги элчиси бўлиб ишлаган, шунингдек, Венгриядаги ўриндошлик асосида элчиси бўлган. Бир вақтнинг ўзида, Ўзбекистоннинг Европада хавфсизлик ва ҳамкорлик ташкилоти ҳамда Венадаги бошқа халқаро ташкилотлар ҳузуридаги доимий вакили лавозимида фаолият олиб борган.
Абат Файзуллаев 2018-2023 йилларда Римдаги дипломатик ваколатхонамизга раҳбарлик қилган Отабек Акбаров ўрнига тайинланди.
Изоҳ (0)