Будапештда Ўзбекистон ва Венгрия ташқи сиёсат маҳкамалари ўртасидаги ҳамкорлик режалари муҳокама қилинди, деб хабар бермоқда «Дунё» ахборот агентлиги.
Қайд этилишича, Ўзбекистон элчиси Абат Файзуллаев Венгрия Ташқи ишлар ва савдо вазирлигининг шарқий алоқаларни ривожлантириш бўйича янги тайинланган давлат котиби ўринбосари Адам Штифтер билан учрашган. Унда истиқболда икки томонлама тадбирларни ташкил этиш билан боғлиқ масалалар муҳокама қилинган.
Суҳбат чоғида томонлар сўнгги йилларда Ўзбекистон–Венгрия муносабатлари барча соҳаларда сезиларли даражада мустаҳкамлангани, пандемия даври бўлишига қарамай, Венгрия ташқи ишлар вазири Петер Сийртонинг 2020 йил бошидан буён Ўзбекистонга олтита ташрифи ташкил этилгани шундан далолат эканини таъкидланган. Айни пайтда турли даражаларда, жумладан, энг юқори даражада мунтазам фаол мулоқот олиб борилмоқда.
Икки томонлама муносабатларни ривожлантиришдаги муҳим босқичлардан бири Венгрия бош вазири Виктор Орбаннинг 2021 йил март ойида Ўзбекистонга расмий ташрифи амалга оширилгани алоҳида таъкидланди. Мамлакатлар ўртасидаги кўп қиррали муносабатлар стратегик шерикликнинг сифат жиҳатидан янги босқичига кўтарилгани ҳолда савдо-иқтисодий, сармоявий, молиявий-технологик ва маданий-гуманитар соҳаларда икки томонлама алоқалар тобора мустаҳкамланмоқда.
Учрашувда Ўзбекистон ва Венгрия ўртасидаги ҳамкорликнинг ҳуқуқий асосларини такомиллаштириш мақсадида Ташқи ишлар вазирлигининг юридик бўлимлари ўртасида маслаҳатлашувлар ўтказиш масалалари ҳам муҳокама қилинди.
Изоҳ (0)