Ўзбекистон ва Венгрия ўзаро ҳамкорликда кино суратга олиш режаларини муҳокама қилди. Бу ҳақда «Дунё» хабар бермоқда.
Қайд этилишича, элчихона кўмагида Ўзбекистон ва Венгриянинг кино саноати учун масъул бўлимлари ўртасида онлайн учрашув ташкил этилди. Унда «Ўзбеккино» миллий агентлиги директори Фирдавс Абдухолиқов, Венгрия ҳукуматининг миллий кино саноатини ривожлантириш бўйича комиссари ва Миллий кино институти директори Чаба Каэл ҳамда Ўзбекистон элчиси Абат Файзуллаев иштирок этди. Мулоқот чоғида ҳамкорликда кино суратга олиш ва маданий тадбирларни ташкил этиш масалалари муҳокама қилинди.
Чаба Каэл ўзбекистонлик ҳамкорлар билан кино саноати соҳасида ҳамкорлик қилишдан манфаатдор эканини билдирди ва «икки халқнинг тарихий илдизлари муштарак» эканини таъкидлади. У, айниқса, тарихий жанрдаги фильмларни суратга олиш бўйича ҳамкорликда иш олиб бориш имкониятларини кўриб чиқишга тайёр эканини билдирди. Венгрия вакили, шунингдек, Ўзбекистоннинг тарихий қаҳрамонлари ҳақида фильм суратга олиниши венгер томошабинларига ўзбек халқининг тарихи ва бой маданияти билан яқиндан танишиш имконини беришини қайд этди.
Унинг айтишича, Венгрия Европада кино ишлаб чиқариш бўйича Буюк Британиядан кейин иккинчи ўринда туради. Кино саноатини ривожлантириш ва хорижий кинокомпанияларни жалб қилиш учун мамлакатда махсус тартиб мавжуд бўлиб, унга кўра, Венгрияда фильм суратга олишда киноижодкорларнинг барча харажатларининг 30 фоизини Венгрия Миллий кино институти қоплаш мумкин. Мамлакат дунёнинг етакчи кинокомпанияларини ўзига тортадиган кўплаб гўзал манзаралар ва ўрта аср меъморчилигига эга.
Чаба Каэл 14–17 сентябрь кунлари Тошкент ва Самарқанд шаҳарларида бўлиб ўтадиган XIV Тошкент халқаро кинофестивалида фахрий меҳмон сифатида иштирок этиш таклифини қабул қилди.
Мавзуга доир:
Изоҳ (0)