Ўзбекистоннинг Австриядаги фавқулодда ва мухтор элчиси Абат Файзуллаев ўриндошлик асосида Ўзбекистоннинг Венгриядаги фавқулодда ва мухтор элчиси лавозимига тайинланди. Бу ҳақда Telegram’даги «Нигоҳ» канали хабар берди.
Абат Файзуллаев Жаҳон иқтисодиёти ва дипломатия университетида бакалавриат ва магистратура дастурлари бўйича таҳсил олган (2000–2007). Шунингдек, у 2009 йилда Тошкент давлат иқтисодиёт университетининг сиртқи бўлимини Халқаро иқтисодий муносабатлар мутахассислиги бўйича тамомлаган. У Ташқи ишлар вазирлигида ва Ўзбекистоннинг АҚШдаги элчихонасида турли лавозимларда ишлаган. 2020 йилнинг августида Ўзбекистоннинг Австриядаги янги элчиси тайинланган эди. Тайинловдан олдин Абат Файзуллаев ташқи ишлар вазири вазирнинг ёрдамчиси – Ташқи ишлар вазирлигининг ташкилий ва назорат бўлими бошлиғи лавозимида фаолият юритган.
Аввалроқ Ўзбекистоннинг Мисрдаги элчиси мамлакат президентига ишонч ёрлиқларини топширгани, Корея ва Доминикана Республикаларининг Ўзбекистондаги янги элчилари тайинлангани, Ташқи ишлар вазирининг биринчи ўринбосари Ўзбекистоннинг Хитойдаги янги элчиси этиб тайинлангани тўғрисида хабар берилганди.
Изоҳ (0)