Швейцариялик дипломат Пьер фон Аркс ЕХҲТнинг Ўзбекистондаги лойиҳалари координатори идорасининг янги раҳбари этиб тайинланди. Бу ҳақда «Дунё» агентлиги хабар берди. Дипломат янги вазифасини бажаришга 2021 йил май ойида киришади.
Маълум қилинишича, 24 апрель куни Ўзбекистоннинг Европада хавфсизлик ва ҳамкорлик ташкилотидаги (ЕХҲТ) доимий вакили, элчи Абат Файзуллаев швейсариялик дипломат Пьер фон Аркс билан онлайн-мулоқот ўтказган.
Ўзбекистон элчиси Пьер фон Арксни юқори лавозимга тайинлангани билан табриклаган, унинг барча билим ва тажрибаси мамлакатнинг ЕХҲТ билан ўзаро алоқаларини янада мустаҳкамлаш ва ривожлантиришга ҳисса қўшишига умид билдирган.
Ўз навбатида, Пьер фон Аркс сўнгги йилларда Ўзбекистоннинг ижтимоий-сиёсий ва социал-иқтисодий ҳаётида амалга оширилаётган ижобий ўзгаришларни, ЕХҲТ ва Ўзбекистон ўртасидаги изчил ривожланиб бораётган муносабатларни юқори баҳолаган.
Маълумот учун, Пьер фон Аркс ЕХҲТнинг Бишкекдаги Дастур бюросига раҳбарлик қилиб келаётган эди. 2006—2016 йилларда у Швейцариянинг ЕХҲТ ҳузуридаги миссиясида маслаҳатчи, сўнгра Доимий вакил ўринбосари лавозимларида ишлаган.
Эслатиб ўтамиз, 2016 йилнинг майидан буён ЕХҲТнинг Ўзбекистондаги лойиҳалари координатори идораси раҳбари сифатида Жон МакГрегор фаолият кўрсатиб келаётганди. Таъкидланишича, у ЕХҲТнинг Туркманистондаги миссияси раҳбари лавозимига тайинланган.
Аввалроқ Ўзбекистон Президенти Администрацияси раҳбарининг ўринбосари Шерзод Асадов Европада хавфсизлик ва ҳамкорлик ташкилотининг Ўзбекистондаги лойиҳалари координатори, элчи Жон МакГрегор билан учрашиб, унга Шавкат Мирзиёевнинг миннатдорлик мактубини ўқиб эшиттирганди.
Суҳбатда Жон МакГрегорнинг Ўзбекистондаги фаолияти самарали бўлгани, ҳамкорликда кўплаб лойиҳалар амалга оширилгани таъкидланган. Тажрибали дипломатнинг келгуси ишларига муваффақият тилаб, эзгу истаклар билдирилган.
Изоҳ (0)