Австрия пойтахти Вена шаҳрида дипломатик кадрлар тайёрлаш соҳасидаги ҳамкорлик масалалари муҳокама қилинди. Бу ҳақда «Дунё» ахборот агентлиги хабар бермоқда.
Маълум қилинишича, Ўзбекистоннинг Австриядаги элчиси Абат Файзуллаев Вена Дипломатия академияси директори, Австриянинг Россиядаги собиқ элчиси Эмиль Брикс билан учрашув ўтказган. Унда Вена академияси ва Ўзбекистондаги Жаҳон иқтисодиёти ва дипломатия университети ўртасидаги ўзаро ҳамкорликнинг истиқболли йўналишлари муҳокама қилинди.
Учрашув аввалида Эмиль Брикс Жаҳон иқтисодиёти ва дипломатия университети фаолиятини такомиллаштириш йўлида амалга оширилган ўзгаришлар билан атрофлича таништирилди. Хусусан, президентнинг «Жаҳон иқтисодиёти ва дипломатия университети фаолиятини тизимли ислоҳ қилиш чора-тадбирлари тўғрисида»ги қарори мазмун-моҳиятига алоҳида эътибор қаратилди.
Мулоқот чоғида мазкур ҳужжатдан келиб чиққан ҳолда Жаҳон иқтисодиёти ва дипломатия университети дарс жараёнларига Вена Дипломатия академияси ходимларини жалб қилиш, шунингдек, университет ўқитувчи-профессорлари малакасини ошириш учун хорижий экспертлар иштирокида маҳорат дарсларини ташкил қилиш масаласи кўриб чиқилди.
Ўз навбатида, Эмиль Брикс ўзаро тажриба алмашиш мақсадида Жаҳон иқтисодиёти ва дипломатия университети вакилларининг ВДАга танишув ташрифини амалга оширишни таклиф қилди. Шу билан бирга, ўзаро талабалар алмашуви дастурларини йўлга қўйиш орқали Жаҳон иқтисодиёти ва дипломатия университетининг бакалавр, магистр ва докторантура йўналишидаги изланувчилари ва мустақил тадқиқиотчилар учун Вена Дипломатия академиясида малака оширишлари имкониятини яратиш масаласи ҳам муҳокама қилинди.
Маълумот учун, 1754 йилда ташкил этилган Вена Дипломатия академияси (Diplomatische Akademie Wien) дунёдаги энг кўҳна дипломатия мактаби ҳисобланади. Талабаларни ўқитишнинг асосий йўналишлари — халқаро муносабатлар, сиёсатшунослик, жаҳон иқтисодиёти, тарих, шунингдек, халқаро ҳуқуқ ва Европа Иттифоқи ҳуқуқи.
Изоҳ (0)