Шавкат Мирзиёев 18 март куни мамлакатда амалий ташриф билан бўлиб турган Европа иттифоқининг халқаро ҳамкорлик бўйича комиссари Йозеф Сикела бошчилигидаги делегацияни қабул қилди. Бу ҳақда Президент матбуот хизмати хабар берди.
Ўзбекистон билан Европа иттифоқи ўртасидаги кўп қиррали муносабатларни янада ривожлантиришнинг долзарб масалалари муҳокама қилинди. Суҳбат аввалида Европа иттифоқининг юқори даражали вакили давлат раҳбарига Европа комиссияси президенти Урсула фон дер Ляйен ва Европа кенгаши раиси Антониу Коштанинг саломи ва тилакларини етказди.
Кейинги йилларда икки томонлама ҳамкорлик, жумладан, сиёсий, савдо-иқтисодий, инвестициявий ва маданий-гуманитар соҳаларда жадал ривожланиб бораётгани қайд этилган. Уни изчил кенгайтириш учун катта имконият ва салоҳият мавжудлиги таъкидланди.
Қайд этилишича, Ўзбекистон ва ЕИ ўртасида Кенгайтирилган шериклик ва ҳамкорлик тўғрисидаги янги битимнинг тез фурсатда имзоланиши ҳам бунга хизмат қилади. Транспорт ва логистика, энергетика, рақамлаштириш, қишлоқ ва сув хўжалиги, бошқа устувор йўналишларда қўшма лойиҳа ва дастурларни илгари суришдан икки томон ҳам манфаатдор экани таъкидланди.
Ўта муҳим минерал ресурсларни қайта ишлаш соҳасида ўзаро манфаатли амалий ҳамкорликни йўлга қўйишга алоҳида эътибор қаратилди. Учрашувда жорий йил апрель ойи бошида Самарқанд шаҳрида “Марказий Осиё — ЕИ” биринчи саммити ва Иқлим форумини ташкил этиш ва ўтказиш жиҳатлари кўриб чиқилди.
Марказий Осиёда минтақавий ҳамкорлик масалалари юзасидан ҳам фикр алмашилди.
21 январь куни Президент ёрдамчиси Саида Мирзиёева Европа иттифоқининг Ўзбекистондаги элчиси Тойво Клаар билан учрашган эди. Тойво Клаар аёлларнинг ҳуқуқий ҳимояси ва иқтисодий имкониятларини кенгайтиришга қаратилган саъй-ҳаракатларни қатъий қўллаб-қувватлашини билдирган.
Изоҳ (0)