Ўзбекистоннинг Жаҳон савдо ташкилотига аъзо бўлиши доирасида Ўзбекистон ва Россия музокаралар олиб борди. Бу ҳақда президентнинг ЖСТ бўйича махсус вакили Азиз Урунов LinkedIn'да маълум қилди.
Унинг билдиришича, 11 март куни бош вазир ўринбосари Жамшид Хўжаев бошчилигидаги делегация Москвада Россия иқтисодий ривожланиш вазири Максим Решетников ва унинг ўринбосари Владимир Иличев билан ўтказган музокараларда ЖСТга аъзолик доирасида бозорга чиқиш бўйича “ҳал этилмаган масалалар” кўриб чиқилган.
“Музокаралар фойдали, мазмунли ва конструктив ўтди. Айни пайтда иккала томон ҳам олдинга силжишга интилмоқда. Қисқа вақт ичида тақдим этган файлларимизга тезкор реакция қилганликлари учун россиялик ҳамкасбларга миннатдорчилик билдирмоқчиман”, деб ёзди Урунов 14 март куни LinkedIn'аги саҳифасида.
Россия Иқтисодий тараққиёт вазирлиги матбуот хизматининг маълум қилишича, Максим Решетников бу учрашувда Россия ва Ўзбекистон президентлари ўртасидаги келишувлар асосида “Россия гази, нефти ва нефть маҳсулотларини етказиб бериш ошиб бораётгани”ни қайд этган.
“Шу нуқтаи назардан, Ўзбекистон энергетика инфратузилмасини модернизация қилиш бўйича режалаштирилган лойиҳаларни амалга ошириш муҳимлиги қайд этилди. Ўзаро озиқ-овқат етказиб бериш ҳажми ошди, бунда Россия ҳажм бўйича деярли паритетга эга: Россиядан Ўзбекистонга 1 миллиард долларга ва Ўзбекистондан қарийб 1 миллиард долларга”, дейилади вазирлик хабарида.
Ташриф давомида бош вазир ўринбосари Жамшид Хўжаев Россия бош вазирининг биринчи ўринбосари Денис Мантуров ва бош вазири ўринбосари Денис Патрушев билан ҳам учрашувлар ўтказган. Ўзбекистон делегацияси таркибида Марказий банк раиси Тимур Ишметов ва транспорт вазири биринчи ўринбосари Маманбий Омаров ҳам бўлган.
“Биз Ўзбекистон бозорини бизнинг экспортчиларимиз учун жуда истиқболли деб биламиз. Кунгабоқар ёғи, қандолатчилик, дон ва чорвачилик маҳсулотларини етказиб беришни кўпайтиришга тайёрмиз”, деган Патрушев учрашувда.
Унинг қайд этишича, 2024 йилда Россия ва Ўзбекистон ўртасида қишлоқ хўжалиги маҳсулотлари ва озиқ-овқат маҳсулотларининг товар айланмаси 20 фоизга ошди. 2025 йилда ҳам ижобий динамика сақланиб қолади.
Ўзбекистон нима учун ЖСТга аъзо бўлиши керак?
Азиз Урунов ташкилотга аъзолик ҳақида “Дарё”га берган интервьюсида “Жаҳон савдо ташкилотига аъзо бўлишдан оладиган энг биринчи манфаатимиз — иқтисодиётда корхоналар учун тенг шароит яратилишидир. Бу ўз навбатида рақобат муҳити яхшиланишига олиб келади ва бу иккинчи муҳим жиҳат — рақобат муҳити яратилишига олиб келади. Рақобатсиз ривожланиш қийин. Тез ривожланган давлатлар тажрибасига қаралса, уларда иқтисодий ўсишнинг асосий манбаларидан бири рақобат муҳити бўлган. Учинчидан, сифатли инвестициялар келади. Бу иқтисодиётнинг барқарор ўсиши учун муҳим омил”, деб айтганди.
Ўзбекистон 2026 йилгача Жаҳон савдо ташкилотига аъзо бўлмоқчи. Шавкат Мирзиёев Ўзбекистоннинг ушбу ташкилотга аъзо бўлиши чуқур ўйланган ва узоқни кўзлаган танлов эканлигини таъкидлаганди.
Изоҳ (0)