Абдумажид Шермуҳамедов Хоразм вилояти ИИБ бошлиғи лавозимига тайинланди. Бу ҳақда вилоят ҳокимлиги хабар берди.
Унга кўра, Абдумажид Шермуҳамедов бунга қадар Тошкент шаҳар Юнусобод тумани ички ишлар фаолиятини мувофиқлаштириш бошқармаси бошлиғи лавозимида фаолият юритиб келган.
Маълумот учун, Абдумажид Шермуҳамедов ўз вақтида Чилонзор тумани ИИБ бошлиғи бўлиб ишлаган. У 2017 йил апрель ойи ўрталарида, президент Шавкат Мирзиёев Чилонзор туманига ташриф буюрганидан сўнг, туман ҳокими билан биргаликда эгаллаб турган вазифасидан озод этилганди.
2024 йил май ойларида бош прокурор буйруғи билан Абдумажид Шермуҳамедов фахрий ёрлиқ билан тақдирланган. У ҳудудда жиноятчиликни жиловлаган, иккинчи сектор ҳудудида ижтимоий-иқтисодий барқарорликка эришган. Шунингдек, ташқи миграцияда бўлган шахслар ва уларнинг оила аъзоларига амалий кўмак берган.
Ички ишлар вазирлигида Ўзбекистонда жиноятчиликка қарши курашиш, криминоген вазиятни барқарорлаштириш ҳамда шахсга доир маълумотларни ҳимоя қилиш масалаларини такомиллаштиришга қаратилган вазифаларнинг ижроси юзасидан тезкор йиғилиш ўтказилиб, вазирга биринчи ўринбосар тайинланганди. Президент қарори билан Андижон вилояти ИИБ бошлиғи лавозимини эгаллаб келган полковник Аюбхон Раҳматуллаев ички ишлар вазирининг биринчи ўринбосари лавозимига тайинланди.
Изоҳ (0)