“Дарё”да Тошкент шаҳрининг Шайхонтоҳур туманидаги мактабларда ота-оналар ташаббуси билан 1 октябрь — Ўқитувчи ва мураббийлар кунига миллионлаб пул йиғилаётгани, аксарият ота-оналар бундан норозилиги хабар берилганди. Тошкент шаҳар мактабгача ва мактаб таълими бошқармаси ҳудуддаги таълим муассасаларида йиғди-йиғдиларга қарши ҳаракатлар бўлишига қарамасдан айрим мактабларда ўзбошимчалик билан пул йиғишлар бўлаётганини тасдиқлади.
Янги ўқув йили олдидан пойтахтимизнинг барча туман умумтаълим мактабларида ўқувчилар ва уларнинг ота-оналаридан турли сабаблар билан пул йиғимлари амалга ошириш қатъиян тақиқланиши бўйича синф раҳбарлари, ўқитувчилар ҳамда ота-оналар кузатув кенгаши вакиллари иштирокида йиғилишлар ўтказилган. Барча огоҳлантирилган. Шунга қарамай, афсуски айрим мактабларда ота-оналар ўртасида ўзбошимчалик билан пул йиғимларини амалга оширишга уринишлар бўлаётганлигини оқлаб бўлмайди. Буни юқоридаги каби хабар ҳам тасдиқлаб турибди, дейилади масъуллар изоҳида.
Бошқарма умумтаълим муассасаларида ноқонуний пул йиғимларига қарши курашишга доимо тайёр эканлигини билдирган.
Шу ўринда яна бир бор эслатиб ўтамиз, таълим муассасаларида таъмирлаш (ремонт), турли тадбир (сўнгги қўнғироқ) ва байрамлар учун пул йиғиш қатъиян тақиқланади, дейди масъуллар.
Шайхонтоҳур туман мактабгача ва мактаб таълими бўлими мудири Баҳром Бакиевнинг “Дарё”га билдиришича, тумандаги 157-мактабда ўқитувчилар байрами муносабати билан оналарнинг ноқонуний пул йиғилишига йўл қўйиб бергани учун мактаб директорига чора кўрилади.
157-сонли мактаб директори Акмалов Анвар Акрамович қўл остида фаолият юритаётган ходимларини назорат қила олмаганлиги, ўз хизмат вазифасига масъулиятсизлик билан ёндашганлиги, коррупцион ҳолатлар аниқланганлиги юзасидан қўпол камчиликларга йўл қўйганлигини инобатга олган ҳолда қонунда белгиланган интизомий жазо чорасини кўришингизда амалий ёрдам беришингизни сўрайман, дейилади бўлим мудирининг бошқарма бошлиғига ёзган хатида.
Изоҳ (0)