«Соғлом бола йили» давлат дастурининг 94-бандига мувофиқ, Халқ таълими вазирлиги томонидан илк маротаба ота-оналар учун болаларни мактабга тайёрлаш бўйича бешта китоб яратилди. Бу ҳақда Ўзбекистон Республикаси Халқ таълими вазирлиги ахборот хизмати хабар бермоқда.
Ҳозирда 436 130 нафар оилага бепул тарқатилаётган мазкур қўлланмалар фарзанди мактабгача таълим тизимига қамраб олинмаган ота-оналар учун мўлжалланган бўлиб, улар ёрдамида боланинг дунёқараши, мантиқий фикрлаши ва нутқи ривожлантирилади, бола шахсий гигиена қоидалари билан таништирилади.
Қўлланмалар «Болажон» таянч дастури асосида рангли-безакли шаклда тайёрланган ва Мактабгача таълим муассасалари ходимларини қайта тайёрлаш ва малакасини ошириш Республика ўқув-методика маркази қошидаги илмий кенгаш томонидан тасдиқланган.
Қўлланмалар бешта китобдан иборат бўлиб, жами 2,5 миллион нусха (ҳар бир китоб 446 минг нусхадан) чоп этилди. Булар:- «Нутқ ўстириш, ўқиш ва саводга тайёргарлик»:
- «Математик тасаввурларни шакллантириш»:
- «Шеърий асарлар тўплами»:
- «Насрий асарлар тўплами»:
- «Соғ танда – соғлом ақл»:
Жойларда туман (шаҳар) халқ таълими муассасалари фаолиятини методик таъминлаш ва ташкил этиш бўлимларининг мактабгача таълим услубчилари, «Маҳалла» хайрия жамоат фонди ва бошқа ҳамкор ташкилот ҳамда идоралар вакиллари билан биргаликда мактабгача таълимга қамраб олинмаган 5—7 ёшли фарзандли оилалар рўйхати шакллантирилиб, ҳозирда уларга қўлланмалар мактаб кутубхоналари орқали бепул тарқатилмоқда.
Ота-оналар қўлланмадан йил давомида фойдаланган ҳолда ўз фарзандини мактаб таълимига сифатли тайёрлайди.
Маълумот учун, бугунги кунда республика бўйича жами 4950 та мактабгача таълим муассасасига 581 539 нафар бола қамраб олинган.
Изоҳ (0)